Бизон питомнигар туристарга саҥа сезону арыйдылар

Бизоннар турар сирдэригэр диэри айан суола. Буранынан көтүтэн үлэһиттэр бизоннарга сакалаакка тэҥнээх күндү астарын кутаннар ыраах ыркый ойуур быыһыттан ыҥыраллар.

Ас бэриллибитин истэн утуу-субуу мустубутунан бараллар. Өр күүппүттүү-көһүппүттүү үтүрүһэ-анньыһа аһаан саҕалыыллар.

Егор Иванов, "Уус Буотама" бизонарий үлэһитэ: "Сылгы курдук эмиэ хаһан аһыыллар эбии. Кинилэр хаары төбөлөрүнэн хаһаллар. Эбии аһатабыт. Күҥҥэ икки киилэ курдук комбикорм биэрэбит, сүүрбэ киилэлии от сииллэр".

Бизоннар Саха сиригэр аан бастаан манна Уус Буотамаҕа 18 сыл аннараа өттүгэр кэлбиттэрэ. Бастакы түһүмэххэ 30 бизону аҕалан олохтообуттара. Онтон ыла тэнийэн билигин 3 улууһунан бааллар. Онтон Горнайга 200-чэкэ бизон номнуо көҥүл ыытыллан, урут өбүгэлэрэ олохсуйа сылдьыбыт сирдэригэр үөрэнэн Сахабыт сирин тыйыс тымныыларын ахсарбаттар.

Семён Егоров, "Уус Буотама" бизонарий салайааччыта: "Кинилэр бу биһиги тыйыс усулуобуйабытыгар тайах курдук сылдьыахтаахтар. Маны ситиһэр сыаллаах-соруктаах үлэлиибит".

Уус Буотамаҕа билиҥҥи туругунан 122 гектар иэннээх сиргэ 42 төбө быйылгы кыстыгы этэҥҥэ туораата.

Былырыын 13 төбө төрүөх биэрбит. Быйыл эмиэ соччону күүтэллэр. Бизоннар аны биир ыйынан муус устар 20-с чыыһылаларыгар төрөөн саҕалыахтаахтар.

Уус Буотама кэрэ айылҕатын, дьэрэкээн көстүүтүн, ураты кыылларын көрөөрү үгүс киһи тоҕуоруһа мустар. Дьоҕус туризм сайдар. Атын дойдулартан, бэйэ да дьон кэлэн дуоһуйа сынньанар.

Нина Захарова, турист: "Түҥ былыргы кыылы көрөр олус интэриэһинэй. Тыыннаахтыы хаама сылдьалларын көрөр олох атын уопут".

Ольга Литвинцева, турист: "Бастаан көрөргө куттаах баҕайылар. Хас биирдии саха киһитигэр бизоннаах хаартыскалаах буолуохтаах дии саныыбын".

Бизоннар Саха сиригэр туспа көрүҥ буолан ааҕыллалларыгар ахсааннарынан 1 тыһыынчаны куоһарыахтаахтар. Оччоҕуна бу бырайыак сыалын-соругун толору сиппитинэн ааҕыллыа. Онуоха диэри өссө да ыраах. Ол эрэн, бизоннар биһиги тыйыс сирбитигэр олорор, төрүүр-ууһуур кыахтаахтар. Ол аата сотору кэминэн бу сыал-сорук силигин ситэр чинчилээх.