Антоновка оскуолатыгар тыраахтыр, бураан ыытарга үөрэтэллэр

Антоновка орто оскуолатын 10 кылааһын үөрэнээччитэ Эрхаан Румянцев дьиҥ уулуссанан баран иһэр курдук тыраахтар көлөнөн айанныыр. Оскуола оҕото бу анал оборуудабанньаны номнуо үөрүйэхтик тутар-хабар.

Эрхаан Румянцев, Н.Н.Чусовской аатынан Антоновка орто агротехническай оскуолатын 10 "в" кылааһын үөрэнээччитэ: "Бастаан анал тэрилгэ ыытарга үөрэнэбит. Быраабылатын толору баһылыы иликпин, үөрэтэ сылдьабын. Оттон ыытарым үчүгэй".

2022 сыллаахха тустаах оскуола анал көҥүл ылан, үрдүкү кылаас оҕолорун А-1, В уонна С категорияҕа үөрэтэр быраабы ылбыта. Ол кэмтэн ыла туспа үөрэнэр сир ананан, оборуудабанньа атыылаһыллан, туран, бу хайысхаҕа үөрэхтэр саҕаламмыттара.

Николай Бочуров, производственнай үөрэтиигэ маастар: "Билигин 10 кылаастары нэдиэлэҕэ иккилии чаас үөрэтэбит. Үс 10 кылаастаахпыт. Быйыл кинилэр “А1” категорияны ылыахтаахтар. Сотору кэминэн эксээмэн тутуохпут. Оскуоланы бүтэрэллэригэр биһигиттэн сибидиэтэлистибэ ылаллар, онтуларынан судаарыстыбаннай техническэй надзорга эксээмэн туттараннар удастабырыанньа ылаллар".

Николай Бочуров хас биирдии үөрэнээччитигэр ымпыктаахтык быһаарар, кини этэринэн уолаттарга интириэс улахан. Отто маннык үөрэтии сүрүн сыала-соруга оҕолор оскуоланы бүтэрэллэригэр номнуо техникаҕа сыстыгас, сыһыаннаах буолалларыгар туһуланар.

Кылааска үөрэппиттэрин аны таһырдьа чиҥэтэллэр. Манна усулуобуйа эмиэ барыта тэриллибит. Анал полигоҥҥа уолаттар үөрэнэллэригэр техника ылыллыбыт.

Данил Фёдоров, Н.Н.Чусовской аатынан Антоновка орто агротехническай оскуолатын дириэктэрэ: "2022 сыллаахха оскуолабыт 110 сыллаах үбүлүөйэ буолбута. Онно выпускниктар бары кыттыһан тыраахтыр ыларбытыгар көмөлөспүттэрэ. Түгэнинэн туһанан кинилэргэ махтанабын. Маны таһынан бааһына хорутарбытыгар фреза ылбыппыт, УАЗ массыынабытыгар бырысыап ылбыппыт".

Маны таһынан уолаттар бураанынан айанныырга үөрэнэллэр. Бу курдук улаатан эрэр эдэр дьоҥҥо инники олохторугар олус туһалаах үөрэх  Антоновка орто оскуолатыгар үөрэтиллэр.