Чыыр истээх масленица билиинчигин Николай Атласов астыыр

Дьыл сырдык кэмин көрсүү үөрүүтүгэр астанар күн курдук төгүрүк билиинчик омос көрдөххө олус судургутук астанар, аҕыйах састааптаах. Ол эрэн  бэйэтэ туспа уратылаах, абылаҥнаах. Биллэр асчыт Николай Атласов масленица нэдиэлэтигэр өрүүтүн ыалдьыттарын бэйэтин ураты блинытынан күндүлүүр.

Николай Атласов, "Атласовтар уһаайбалара" ресторан бренд-асчыта: "Сылаас үүккэ оҥорор ордук. Ортотунан 40 кыраадыс буоллаҕына сөп". 

Онтон Николай сылаас үүккэ бурдугу ытыйар итиэннэ сымыытын, тууһун, суодатын булкуйар. Бу кэмҥэ ынах арыытын уонна мас арыытын тэҥинэн уулларан кутар. Оччоҕо билиинчик тэһэҕэстэрэ элбэх уонна сымнаҕас буолар диэн үллэстэр. Убаҕас тиэстэни хомуога суох буоллун диэн сиидэлиир.

Дьэ онтон сырылаччы буһарбытынан барар. Николай үөрүйэхтик туттан бииртэн биир билиннчиги таһаарар.

Николай Атласов, "Атласовтар уһаайбалара" ресторан бренд-асчыта: "Билиинчиги истээх гынар буоллахха хас да хос буолар. Дьон оннугу ордук сөбүлээн сиир ".

Николай Атласов кэнники сылларга дойду төрүт астарын сөргүтүүгэ уонна тарҕатыыга күүскэ үлэлэһэр. Бу уһун сыллаах бырагыраамаҕа масленица билиинчигэ эмиэ киирэр. Кини иһин сахалыыга чугаһатан оҥорор. Холобура, бу сырыыга чыыр истээх гына суулуоҕа.

Николай Атласов, "Атласовтар уһаайбалара" ресторан бренд-асчыта: " Дойду үрдүнэн үлэлиир “Гастрономическая карта” диэн бырагыраамаҕа баарбын уонна өрөспүүбүлүкэҕэ “Вкус Якутии” диэн холбоһукка баарбын. Уопсай сыалбут сорукпут диэн Россия түҥ былыргы астарын тилиннэрии, норуокка тарҕатыы".

Маныаха уруккуну сөргүтүүгэ сонуннук тириэрдии ирдэнэр. Холобура, былыр хотулар балыгы хатарар ньымаларын Николай билигин туһанар. Итиэннэ таас иһиккэ  хаппыт балыктан миин оҥорор. Түргэнник астанар истээх билиинчиги, балык миинин уулусса аһыгар киллэрэргэ дьулуһар.

Кырдьык да, балык истээх, итии мииннээх толору киһи тотор бүлүүдэтэ буолан таҕыста.