Саха сиригэр сибиэһэй салгыҥҥа сынньанар пааркалар үлэлэрин саҕалаатылар

Өлүөнэ өрүс үрдүгэр аһаҕас халлаан анныгар турар “Доҕордоһуу” түмэл кыһыҥҥы уутуттан тахсарга бэлэмнэнэр. Тыһыынчаттан тахса гектар иэннээх Саха сирин историятын биир кэрчик кэмин көрдөрөр ураты түмэл үлэлээбитэ номнуо 40-ча сыл буолла. Музей сиригэр уопсайа 23 историко-архитектурнай эбийиэк баар. Билигин үлэһиттэр саҥа сезону арыйарга бэлэмнииллэр. Оттон биһиги устар бөлөххө бастакы экскурсияны тэрийдилэр. Бастакы эбийиэк атыыһыт Басов олорбут дьиэтэ.

Марк, Өлүөнэтээҕи история-архитектура түмэлин экскурсовода: «19 үйэҕэ тутуллубут. Баай киһи, атыыһыт Басов диэн киһиэхэ. Бу үтүгүннэриитэ 1991 сыллаахха тутуллубута. Дьиэ иһигэр 6 хостоох, онно 6 араас быыстапка баар».

Бу курдук экскурсоводтар бары эбийиэктэри кэрийэн көрдөрдүлэр. Манна даҕатан эттэххэ хас биирдии сынньана кэлээччи манна бастатан туран историяны кытта билсэр, билиитин хаҥатар кыахтаах. Экскурсия кэннэ  салгыы эти-хааны уһугуннара сыыртан сырылыыбыт.

Сынньанар сиргэ уопсайа 5 сыыры оҥоро сылдьаллар. Итиэннэ сотору кэминэн манна атракционнар үлэлиэхтэрэ. Оттон хаартыскаҕа түһэргэ анаан араас муус оҥоһуктар кэчигирэспиттэр. Үлэһиттэр сынньалаҥы тэрийиигэ бары усулуобуйаны олохтууллар.

Надежда Новоприезжая, Өлүөнэтээҕи история-архитектура түмэлин дириэктэрэ: «Суотту «Дисней Ленда» диэн ааттыахтарыттан ыла бу паарка үлэлиир. Манна дьон кэлэн сырылаан, сибиэһэй салгыҥҥа сыньанан, аһаан, үөрэн көтөн, сылаас дьиэлэргэ олорон бараллар. Ону таһынан беседкалар бааллар, шашлык астыыр сиригэр уонна аттракционнар бааллар: квадроциклар, бураннар уонна тирдар».

Аһаҕас халлаан анныгар турар “Доҕордоһуу” түмэлэ бу өрөбүллэртэн номнуо ыалдьыттарын кэтэһэр. Сахабыт сирин баай историятын билэ-көрө, итиэннэ эти-хааны уһугуннара, сааскы сынньалаҥы туһалаахтык атаарыахха сөп.