Дьокуускайга тутуу эйгэтин быыстапката турда

Дьиэ-уот тэринии, олох-дьаһах тупсарыы тутаах тэриллэрэ бу манна турдулар. Регионнар икки ардыларынааҕы тутуу, олох-дьаһах коммунальнай хаһаайыстыба уонна уот-күөс эйгэтин эргиэмсиктэрэ, оҥорон таһаарааччылара Дьокуускай куоракка муһуннулар. Манна Сахабыт сириттэн уонна Арассыыйа 15 регионуттан 40 тахса тэрилтэ кэлэн саҥа сүүрээннэри, ураты ньымалары билиһиннэрэллэр. Бүтэһик сылларга дьиэ туттуу, олорор усулуобуйаны тупсарыы элбээбитин бэлиэтииллэр.

Иван Данилов, быыстапка кыттыылааҕа: «Льготнай ипотека, сүрүнэ судаарыстыба өйөбүлэ буоллаҕа. Ковид бириэмэтигэр дьоннор өйдөөтүлэр – биир хостоох кыбартыыра икки оҕолоох ыалга кыараҕас буолар. Ону өйдөөннөр айылҕа диэки тардыһар буоллулар дьоннор. Саастаах эрэ дьоннор буолбакка, эдэр ыаллар эмиэ».

Быыстапкаҕа сүрүннээн дьиэ ис-тас бараанын оҥорооччулар, инженернай коммуникациялары тардааччылар, үрдүкү технологияннан туһанааччылар кэллилэр. Манна олохтоох дьон эмиэ саҥа, ураты сүүрээннэри көрдүүллэр. Ол курдук, биир ураты болҕомтону ылбыт сэлээркэннэн оттуллар, уокка холбонор оһох буолар. Бу тэриллэр саха сиригэр кэлэн үлэлээбиттэрэ биир сыл буолла.

Пётр Копырин, быыстапка кыттыылааҕа: «Биһи өрөспүүбүлүкэбитигэр гаас элбэх сиргэ тиийбэт, киин ититиигэ холбонор киһи аҕыйах. Уокка холбонор оһох оннугар туттуохха сөп».

Быыстапканы көрбүт олохтоох дьон сүрүннээн саха хампаанньалара аҕыйахтарын, олохтоох оҥорон таһаарааччылар кыттыбатахтарын бэлиэтииллэр. Итиэннэ сорох дьон Сахабыт сирин ырыынагар суох саҥа, сонун тэриллэр кэлбиттэр диэн үөрэллэр.

Иван Попов, Дьокуускай куорат олохтооҕо: «Урукку быыстапкалары кытта тэҥнээтэххэ лаппа кыччаабыт. Урукку сылларга арааһынай хочуоллар диэн, маһы чочуйар диэн буолунай этэ».

Дьон сүрүннээн маннык быыстапкаларга сүбэ-ама ылаары, сыана тэҥнии кэлэллэр. Быыстапка олунньу ый 29 күнүгэр диэри буолуоҕа. Аны мантан сайын эмиэ күүстээх тутуулар саҕаланыахтара турдаҕа.