Саха сирин быыһыыр сулууспа үлэһиттэрэ хапсаҕай күрэҕэр кытталлар

Үгүс дьон олоҕун быыһаабыт, Саха сирин быһыыыр сулууспатын биир тарбахха баттаннар үлэһитэ Сергей Рожин улахан күрэххэ кыттаары бэлэмнэнии үөһүгэр сылдьар. Кини кыра оҕо эрдэҕиттэн хапсаҕайынан улуһуйбут, билигин бу төрүт спорпут көрүҥэр маастар киһи хапсаҕай үлэбэр да, олохпор да туһалыыр диэн тоһоҕолоон этэр.

Сергей Рожин, СӨ быыһыыр сулууспатын 3 кылаастаах быыһааччыта, хапсаҕайга спорт маастара: «Уопсайынан кыра  даҕаны, улахан даҕаны саастаах дьоннорго хапсаҕай туһалаах диибин. Имигэс, тулуурдаах, күүстээх буоларга сөптөөх. Быыһааччылартан 20 киһи күрэххэ бэлэмнэнэ сылдьабыт, ким күүстээх, бэлэмнээх кыайдын диибин».

Саҥа үүнэр ый саҕатыгар үгэскэ кубулуйбут дьон олоҕор дьаһаҕар куттал суох буолуутун хааччыйар судаарыстыбыннай биэдэмистибэ көҕүлээһининэн ааһар хапасаҕайга күрэх ыытыллыаҕа. Быйыл бу күрэхтэһиигэ үгүс элбэх уларыйыылар киирдилэр, онтон биирдэстэрэ күрэх таһыма.

Владислав Шадрин, СӨ быыһыыр сулууспатын салайааччытын солбуйааччы: «Быйыл күрэхпитин гран при диэн таһымҥа таһаардыбыт. Саха сиригэр икки гран при таһымнаах күрэх баар хапсаҕайга: АЛРОСА уонна Хаҥалас хапсаҕайа. Ирдэбилэ диэн, элбэх маастар кэлэн кыттыахтаах уонна бирииһин кээмэйэ – мөлүйүөнтэн тахса буолуохтаах. Муҥутуур кыайыылаахтарга 100 тыһ. биэрэбит 75 кг. тахсаларга уонна бастаабыттарга 30 тыһ. Уонна аата уларыйда: “Турнир министерства по делам гражданской обороны и обеспечения безопасности жизнедеятельности населения РС(Я)” диэн буолла».

Быйылгы күрэххэ үгэскэ кубулуйан, Быһыыр сулууспа, Ыксаллаах быһыы-майгы, баһаарынай сулууспа үлэһиттэрэ, Авиалесохрана, ис дьыала уонна Росгвардия бөҕөстөрө кыттыыны ылыахтара. Билигин бу эйгэ үлэһиттэригэр бэлэмнэнии үгэнэ.

Максим Колесов, СӨ быыһыыр сулууспатын 2 кылаастаах быыһааччыта: «Хапсаҕай үлэбитигэр көмөлөһөр. Үлэбитигэр түргэнник толкуйдаан быһааран ыларга көмөлөһөр быһылаах. Ол иһин миэхэ үлэбэр судургу буолар. Эккин хааҥҥын эрчийэргэр туһалаах дии саныыбын».

Турнир хапсаҕай федерациятын быраабылатынан ыытыллар. Эр дьоҥҥо уонна бэтэрээннэргэ. Билигин олунньу 29 күнүгэр диэри кыттааччылартан сайаапкалары хомуйаллар.