Хотугу хаамыы быйылгыттан спорт көрүҥүн быһыытынан биллэрилиннэ

Төһө даҕаны тыйыс тымныыларбыт ситэри уҕарыйа иликтэрин иһин күн-дьыл туруга уһаан дьон-сэргэ таһырдьа тахсара үксээбит. Сибиэһэй салгыҥҥа сынньалаҥ биир көрүҥүнэн биллэн турар спорт буолар, оннук көрүҥнэртэн биирдэстэрэ – скандинавскай хаамыы.

Киһи доруобуйатыгар туһалаах уонна эт-сиин уопсай туругун сайыннарар спорт саҥа көрүҥүнэн хотугу хаамыы буолар. Саастарыттан тутулуга суох бу көрүҥҥэ сыстыан баҕалаах дьону-сэргэни «Стимул» хаалыктаах хаамыы таптааччыларын кулууба үөрэ-көтө көрсөр. Аҕа саастаах пенсионер Евдокия Прокопьевна бу көрүҥү сэҥээрэн 2010 сылтан дьарыктанар.  Сибиэһэй салгын уонна спорт туһатын туһунан санаатын үллэстэр.

Евдокия Сергеева - Дьокуускай олохтооҕо, пенсионер: «Сибиэһэй салгын киһи туругар дьайыыта улахан. Салгыҥҥа хаамаргар ыйааһынын түһэр, хаанын баттааһына тупсар уонна элбэх доҕоттордоноҕун, элбэх дьону кытта билсэҕин».

Быйылгы сылтан саҕалаан хотугу хаамыы спорт көрүҥүн быһыытынан биллэрилиннэ. Онон 15-тэриттэн үрдүк саастаахтар норматив туттаран спорт араас категорияларын ылыахтарын сөп. Владимир Иванов инструктор быһыытынан үлэлээбитэ 11-с сылыгар барбыт. Кини этэринэн хайа баҕар баҕалааҕы норматив туттарарга бэлэмнээн, «Стимул» кулууп күүс-көмө буолуоҕун сөп. 

Владимир Иванов, инструктор: «Хотугу хаамыы спорт корүҥэр 2024 сылтан киирдэ. Номнуо балыһыанньата тахсан турар, онон билигин хайа баҕарар киһи спорт маастарыгар кандидат, спорт маастара буолуон сөп».

Лаура Константинова хаалыктаах хаамыы көрүҥүн сэҥээрэн номнуо ахсыс сылын дьарыктанар. Норматив толорон спорт маастара үрдүк аатын ыларга холонор баҕа санаалаах. Төһө кыалларынан биир да дьарыгы көтүппэккэ сылдьар.

Лаура Константинова, Дьокуускай олохтооҕо, пенсионер: «Владимир Ильичка нэдиэлэҕэ үстэ дьарык буоларыгар сылдьабын. Төһө кыалларынан сылдьа сатыыбыт, кыһын манежка киирэбит, халлаан кыратык сылыйда эрэ таһырдьа дьарыктана тахсабыт».

Саха Сиригэр саҥа көрүҥ үгүс сэҥээриини ылла. Дьокуускай куоракка номнуо тыһыынчаттан тахса киһи хаалыктаах хаамар. Аны быйылгыттан баҕалаахтар норматив туттаран спорт маастарыгар тиийэ разряд ылыахтарын сөп буолла.