Сунтаар улууһун Кэмпэндээйитигэр култуура дьиэтэ арылынна

Аалай лиэнтэ быһылынна. Кэмпэндээйи нэһилиэгэр күүтүүлээх култуура дьиэтин үөрүүлээх аһыллыыта. Саха сиэринэн саҥа дьиэҕэ сыт таһаардылар, аал уоту айах туттулар. Баараҕай тутуу 1000 кв.м. иэннээх, уопсайа 150 миэстэҕэ анаммыт. Тутуу 2022 сыл ыам ыйыгар саҕаламмыт уонна былаантан халбарыйбакка силигэ ситэн олоххо киирдэ.

Анна Тотонова,  култуура дьиэтин дириэктэрэ: «150 миэстэлээх улахан кииммит үлэҕэ киирдэ. Бука бары үөрэбит көтөбүт. Бу эбийиэк үлэҕэ киирэрин 5 сыл кэтэстибит».

Киэҥ-куоҥ эбийиэк аныгы кэм ирдэбилигэр  толору эппиэттиир.  Сырдык тупсаҕай дьиэ аныгы технологияларынна, уотунан-күөһүнэн, LED экранынан толору хааччыллыылаах, онон үгүс тэрээһиннэри ыытар кыахтанныбыт диэн олохтоохтор үөрүүлэрин үллэстэллэр.

Александра Евсеева, Кэмпэндээйи олохтооҕо: «Бүгүн Кэмпэндээйи бүһүөлэгэр саҥа кулууп дьиэтин аһыллыытыгар кэлэн турабыт. Элбэх үлэ ыытылынна, олохтоохтор үөрдүбүт көттүбүт»

Ураты кэрэ айылҕалаах Кэмпэндээйи нэһилиэгэ талба талааннаах дьоннорунан аатырар. Онон манна култуура дьиэтэ тыын суолтаах. Саҥа кулуупка бастакы кэнсиэр саамай долгутуулаах түгэн. Манна нэһилиэк үгүс олохтооҕо кыттыстылар, Сунтаар улууһун мааны куоластаахтара арыллыыга анаан түмүстүлэр.   

Олохтоохтор сынньалаҥнарын табыгастаахтык тэрийэргэ анаан эбийиэк үгүс элбэх хостоох, киирээти кытта ыалдьыттары көрсөр киэн тыйаатыр киэниттэн итэҕэһэ суох фойелаах. Онон нэһилиэккэ култуура сайдыытыгар бары усулуобуйа тэриллибит. Кэмпэндээйилэр үҥкүү ансаабылларынан киэҥник биллэллэр, онон бу хайысханы күүскэ сайыннарар былааннаахтар.

Анна Тотонова, култуура дьиэтин дириэктэрэ: «Истиэнэтэ бүтүн сиэркилэннэн ыйаммыт саалаҕа үҥкүүлээннэр киэҥ эйгэҕэ биһи кэнчээри ыччаттарбыт дьэ тахсыахтара».

Быйыл Өрөспүүбүлүкэҕэ 80-ча социальнай эбиийиэк тутуллан үлэҕэ киириэҕэ. Ол курдук оскуолалар, уһуйааннар, балыыһалар уонна култуура дьиэлэрэ арыллыахтара. Бу туутулар бары национальнай бырайыактар иилэринэн олоххо киирэллэр. 

Айсен Николаев, Ил Дархан: «Национальнай бырайыактарынан үчүгэйдик үлэлээммит уонна улахан өйөбүлү Президеммыт Владимир Владимирович Путин биэрэн федерацияттан элбэх үп харчы кэлэн элбэх тутуу бара турар. Улахан куораттартан саҕалаан кыра тыа сиригэр тиийэ барытыгар тутуу барарыгар биһи үөрэбит. Уонна Саха сирэ экономикаҕа даҕаны социальнай эйгэҕэ даҕаны сайдыа диэн эрэл үөскэтэр».

Онтон Кэмпэндээйи олохтоохторугар култуура дьиэтэ - нэһилиэк эргийэр киинэ буолуоҕа. Манна эбии бибилиотека көһөн киириэҕэ. Оччоҕо олохтоохтор иллэҥ кэмнэрин атаарыы биир сиргэ түмүллүөҕэ.