Инсульт кэннэ хаампат буолбут дьону атаҕар туруорар аппараат кэллэ

Аныгы үйэ тылынан робот. Николай Решетников Саха сиригэр кини  көмөтүн бэйэтигэр боруобалаабыт ыарыһахтартан биирдэстэрэ. Кини инсульт кэннэ доруобуйатын чөлүгэр түһэрэ реабилитационнай кииҥҥэ эмтэниини ааһар. Үөрүйэҕэ суохха кутталлаах,  ол эрэн кини абырала онтон өссө күүстээх буолуо диэн  эрэлэ икки бүк улахан.

Николай Решетников, ыарыһах: "Бу олус туһалаах тэрил эбит. Охтуом диэн куттаммаккын, туох баар сүһүөхтэргин барытын үлэлэтэр. Чөлүгэр түһэриигэ олус үчүгэй эбит". 

Экзоскелет  көмөтө сүҥкэн буолуохтаах. Хаампаты да атаҕар туруорар кыахтаах диэн үлэһиттэр бэлиэтээн этэллэр. Кинин туһаныы компьютер нөҥүө. Хас биирдии ыарыһах быһыытын-таһаатын учуоттаан оҥоһуллар.

Анна Макарова,  3№-дээх өрөспүүбүлүкэтээҕи клиническэй балыыһаҕа дьон доруобуйатын чөлүгэр түһэрэр салаа сэбиэдиссэйэ: “Бу ураты оборудование экзоскелет диэн. Тимир араамалаах, уотунан барар салайыллар тэриллээх. Онон олох хаампат киһини хаамтарар кыахтанныбыт”.

Ыарыһахтарга күүскэ тирэх буолар, киһиэхэ хамсаабат гына ыга туттаран кэлгиллэр.  Онуоха анал үөрэҕи ааспыт инструктордар салайан, бырагырааманы туруоран биэрэллэр. Биир робот 25  киилэлээх, манна  ыарыһах ыйааһына эбиллэр. Ол эбэтэр иснтруктордар уопсайа 100-ча киилэни хамсаталлар, ейеен-убаан көмөлөһөллөр.

Степан Стручков, 3№-дээх өрөспүүбүлүкэтээҕи клиническэй балыыһаҕа  эти-хааны эрчийиигэ методист-инструктор: “Сытар ыарыһахтарга олус туһалаах робот. Куттаммат буолаллар уонна тирэхтээх буолаллар”. 

Дойду президенэ Владимир Путин көҕүлээһининэн олоххо киирбит "Доруобуйа" национальнай бырайыак үлэтэ бу курдук улахан абыраллаах. Экзоскелет эмиэ бу бырайыак чэрчитинэн кэллэ. Олорботу олордор, турбаты туоруорар, хамсамматы хамсатар, оннооҕор кирилиэһинэн хаамтарар, кыахтаах диэн хайҕанар.

Хас күн аайы дьарык кэннэ, ыарыһах бэйэтигэр эрэлэ улаатар. Дьарыгын эбэн, аа-дьуо бигэтик, тирэхтээхтик турар буолар. Бу курдук кини олоххо сыыйа төннөр.