Федор Марков аатын Ми-8 бөртөлүөккэ иҥэрдилэр

Саха сирин авиациятын сайдыытыгар сүҥкэн кылааттаах Федор Марков аата Ми-8 бөртөлүөккэ иҥэрилиннэ. Үөрүүлээх тэрээһиҥҥэ кини кэргэнэ, оҕолоро, сиэннэрэ кыттыыны ыллылар уонна өр сылларга үлэлээбит тэрилтэтин салайааччыта, үөлээннээхтэрэ. Федор Гаврильевич  салгын ааллара туох да кээһэниитэ суох көтөллөрүн туһугар үйэ аҥаарын кэриэтэ үлэлээбитин, үгүс ыччаты  авиация инженерын курдук ыарахан идэҕэ уһуйбутун, салайбытын үллэһиннилэр.

Татьяна Маркова, Федор Марков кэргэнэ: "Федор Гаврильевич аатын бөртөлүөккэ иҥэрии наһаа улахан чиэс-бочуот дии саныыбын. Маннык олус маассабай буолбатах. Онон улахан махталбытын тиэрдэбит. Кэргэним аатын сүкпүт бөртөлүөт медисиинэҕэ көтөр, онон сүрдээх улахан соруктаах. Өр сылларга сулууспалаатын диэн баҕарабын".

Федор Марков Ригатаааҕы авиационнай институту бүтэрээт да үлэтин Ньурбатааҕы авиаэтэрээккэ  саҕалаабыта. Оччолорго Сунтаар,Бүлүү, Үөһээ Бүлүү уонна Кыһыл Сыыр Ньурбаҕа кииннэнэллэрэ. Этэрээт 1,5 тыһыынча үлэһиттээҕэ, анаардас Ми-6 диэн 16 бөртөлүөттээҕэ. Өрөспүүбүлүкэҕэ барытыгар көтөллөрө, ону таһынан Тюмень куоракка ниэп-гаас салаатын сайыннарыыга, БАМ тутуутугар, оттон манна алмаас бырамыысыланнаһын төрүттэһиигэ үгүстүк үлэлэспиттэрэ. Бу улахан бырайыактарга Федор Марков бэйэтин уһулуччу исписэлиис быһыытынан көрдөрбүтэ. 

Иван Ильинов, "Полярные авиалинии" хампаанньа Ньурбатааҕы филиалын дириэктэрэ: "Федя 2008 сыллаахха Дьокуускайга киин офиска техническэй дириэктэринэн ыҥырыллан кэлэн үлэлээбитэ. Кини исписэлиис да быһыытынан сирдэрбэтэҕэ, салайааччы да быһыытынан сирдэрбэтэҕэ, табаарыс быһыытынан да сирдэрбэтэҕэ. Онон бөртөлүөккэ кини аатын иҥэрэллэрэ улуу дьыала, сөптөөх дьыала, махталлаах дьыала".

Федор Гаврильевич бу сыл муус устарыгар авиацияҕа үлэлээбитэ оруобуна үйэ аҥаара буолуохтаах этэ. Онтон кини аатын билигин оҕолоро уонна сиэннэрэ салҕыыллар. Кини олоҕун анаабыт таптыыр идэтигэр  ыччаттарын бэйэтин үтүө холобуругар сыһыарбыт.

Ньургустаана Семенова, Федор Марков кыыһа: "Аҕабын кытта 1998 сылтан Ньурбаҕа “Полярные авиалинии” хампаанньаҕа үлэлээн саҕалаабытым. Билигин бу эйгэҕэ үлэлээбитим 25 сыл буолла. Убайым Марков Гаврил “Якутия” авиахампаанньаҕа үлэлиир, кыыһым эмиэ. Онон биһиги дьиэ кэргэн бу салааҕа сүүстэн тахса сылы биэрдибит".

Федор Марков үлэлиир сылларын тухары Саха сирин тыйыс усулуобуйатыгар авиация инженердэрэ салгын суудуналарын холкутук өрөмүөннүүллэрин, туохха да тэҥнэммэт ураты баай уопуттарын ситиспитэ. Онтон кини аата иҥэриллибит бөртөлүөт сылы эрчиччи санавиацияҕа көтөр, оттон сайыҥҥы өттүгэр ойуур баһаардыгар.