Көһө сылдьар быраастар биригээдэлэрэ Алдан улууһугар үлэлиир

13 уустук эпэрээссийэ, 300 тахса ыарыһаҕы көрүү. Өрөспүүбүлүкэтээҕи №2 балыыһа быраастара Алдан улууһугар медицинэ көмөтүн оҥороллор. Уопсайа 9 үрүҥ халааттаах аанньал нэдиэлэ устата тустаах оройуоҥҥа нэһилиэнньэни көрөр. Бу күннэргэ 10 тахса эпэрээссийэни оҥордулар. ЛОР быраас Александр Ядреев муннутугар искэҥ тахсыбыт киһини эпэрээссийэлииргэ бэлэмнэнэр.

Александр Ядреев, СӨ 2-ис № балыыһатын - суһал медицинэ киинин  хирургтарын көһө сылдьар биригээдэлэрин оториноларинголог бырааһа: «Поликлиникаҕа ЛОР өттүнэн ыарыһахтары көрдүм, 4 киһини эппэрээссийэҕэ анаатыбыт. Билигин эппэрээссийэ буолар. Муннутугар искэҥнээх киһи баар, ону оҥоруохтаахпыт».

Бу маннык уустук эпэрээссийэлэри Алдан улууһун олохтоохторо мобильнай хирургтар көмөлөрүнэн миэстэтигэр ылар кыахтаннылар. Тустаах бырайыак тохсунньу ыйтан Ил Дархан көҕүлээһининэн үлэлээн саҕалаабыта. Ол курдук, медиктэр бастаан Нерюнгри оройуонугар сылдьыбыттара, манна 200 тахса олохтооҕу көрбүттэрэ, 30 эпэрээссийэни оҥорбуттара.

Михаил Самсонов, СӨ 2-ис № балыыһатын - суһал медицинэ киинин  хирургтарын көһө сылдьар биригээдэлэрин колопроктолог-хирург бырааһа: «Элбэх исписиэлиистэр бааллар, ол быыһыгар: травмотолог, хирург, колопроктолог, кардиолог, терапевт уонна анестезиолог. Элбэх анал көмөнү оҥоробут. Травмотологтар таас өттүк сүһүөҕүн уларыталлар. Хирургтар лапароскопическай эппэрээссийэлэри оҥороллор».

Алдан улуустааҕы балыыһатын быраастара мобильнай биригээдэҕэ эмиэ күүс-көмө буоллулар. Суһал медицинэ көмөтүгэр наадыйар ыарыһахтары эрдэттэн испииһэктээн, ыҥырталаан анаалыстары ылбыттар. Эпэрээссийэҕэ бэлэмнээбиттэр. Онон хирургтар биригээдэлэрин кытта биир ыкса ситимнээх үлэ барда. Үс күн иһигэр 300 тахса киһи туһааннаах медицинэ көмөтүн ылла, оттон 16 ыарыһах эпэрээссийэлэнээри балыыһаҕа киирдэ. Хирургтар көһө сылдьар биригээдэлэрэ Алдаҥҥа олунньу 13 күнүгэр диэри үлэлиэҕэ.