ХИФУ Автодорожнай факультетын саҥа чинчийиилэрэ

Автодорожнай факультет устудьуоннарын саҥа оҥоһуга көрүдүөр устун хаамар. Чебышев айбыт тосхолунан оҥоһуллубут макет. Бу сонун көстүүлээх оҥоһуу суола-ииһэ суох, кута, бадараан буолбут сирдэринэн туох да харгыһа суох таһаҕаһы тиэйэргэ анаммыт. Биһиги көрөр оҥоһукпут хас да төгүл кыччатыллан оҥоһуллубут.

Елизавета Иовлева, ХИФУ автодорожнай бакылтыатын "Машиноведение" хаапыдыратын сэбиэдиссэйэ: «Ат хаамарын үтүктэн оҥоһуллубута. Бу массыына ууну хаары, суола суох сири ааһар».

Онтон массыынаны туһаныы уонна өрөмүөннээһин кафедратыгар араас туттуллан бүппүт малтан күөх төлөнү ылыы чинчийиилэрэ бараллар. Холобур манна көөбүлтэн уонна балбаахтан ылары үөрэтэ сылдьаллар. Инникитин бу ылбыт гаастарын массыына уматыгар, дьиэни оттууга туһаныахха сөп буолар.

Николай Петров, ХИФУ автодорожнай бакылтыатын массыынаны туһаныы уонна өрөмүөннээһин хаапыдыратын дассыана: «Бу установкаттан биогазовай уматык ылабыт. Ынах киититтэн ылабыт. Састааба: 60% метан, 35-40% углекислай гаас. Маны массыынаҕа эбэтэр сылытыыга туттуохха сөп».

Евсей Анисимов бу ылыллыбыт гааһы туһаҕа таһаарарга балааккалары, ыраах айаҥҥа сылдьар дьон массыыналарын уонна норуокка биллибит көһө сылдьар гараажтары сылытарга анал гааһынан үлэлиир сылытар тэрили айан таһаарбыт, бу оҥоһугунан кини кандидатскайын көмүскээбит

Евсей Анисимов, ХИФУ автодорожнай бакылтыатын массыынаны туһаныы уонна өрөмүөннээһин хаапыдыратын аҕа уһуйааччыта: «Эксперимент көрдөрөрүнэн маннык балаакканы 1 чаас 25 мүнүүтэ иһигэр 20 кыраадыска дылы сылытар таһырдьа -40 эрдэҕинэ».

Онтон бу цифровой технология нөҥүө суол-иис кыһалҕатын, транспорт боппуруостарын быһаарарга туһуламмыт кабинет буолар. Манна устудьуоннар куорат суолларын оҥорууга, массыына харгыстара тахсыбатыгар туһуламмыт чинчийиилэри оҥороллор. Суолу оҥоруу болдьоҕун кылгатыыга анаммыт үлэлэр бараллар.

Алексей Устинов, ХИФУ автодорожнай бакылтыатын устудьуона: «Урут ыйы ыйынан оҥорор эрдэхтэринэ, манна коптер ылаҕын, чаас устата түһэрэҕин барытын, бырагыраамаҕа угаҕын – сыыппара модель таһаарар бэйэтэ».

Сахабыт сирин тыйыс усулуобуйатыгар массыына туругун, суолу тупсарыыга анаммыт араас чинчийиилэр, сонун оҥоһуктар бу курдук сыллата элбии тураллар, кэскиллээх саҕалааһыннар олохо киирэллэр.