Дьокуускайга ыарахан балаһыанньаҕа түбэспит дьоҥҥо көмө киинэ үлэлиир

Юля уонна Олеся таҥаһы тутар сир баарын билэн, кэппэттэрин наадыйар дьоҥҥо туһаҕа бардын диэн аҕаллылар. Бу баараҕай киин маҕаһыынтан уратыта манна баары барытын босхо ылаҕын, босхо туттараҕын.  Көмө киинэ куоракка 2020 сыллаахха тэриллэн үлэлээбитэ. Онтон ыла олох ыарахаттарыгар түбэспит дьоҥҥо сүрүн тирэнэр кииннэринэн буолбута. Таҥастан ураты үлэлиир бөҕө туруктаах тиэхиникэни кытары булуохха сөп. Маны таһынан араас кинигэ, альбом, оонньуур.

Олеся Слепцова, Дьокуускай куорат олохтооҕо: «Биирдэ да кэппэтэх эбэтэр аҕыйахта кэппит таҥастарбыт туһалаах буоллун диэн санаалаах кэллибит».

Юлия Хомподоева, Дьокуускай куорат олохтооҕо: «Таҥас аҕалар дьон элбэх эбит. Ону көрөн астынныбыт. Кыһыҥҥы да сайыҥҥы да таҥас булуохха сөп эбит».

Бу кииҥҥэ кыһынын күҥҥэ 20-тэн тахса киһи кэлэн барар. Муҥутаан 54 киһиэхэ тиийэ сылдьыбыта. Үгүс наадыйар дьон маннык үтүө санаа дьиэтэ баарын билбэккэ сылдьар эбит. Ордук элбэх оҕолоох ийэлэр, соҕотох көрүүтэ суох хаалбыттар, баһаарга малларын былдьаппыт дьиэ кэргэн кэлэллэр. Дьыл кэмиттэн көрөн, халыҥ-чараас таҥас арааһа баар. Оҕо түргэнник улаатар буолан, биир сыл кэтэр таҥаһын мантан буор босхо ылар дьон үгүс.

Үтүө санаалаах волонтердар бу киини үлэлэтэ олороллор. Күн аайы сарсыардаттан киэһээҥҥи диэри дьон аҕалбыт таҥаһын наардыыллар. Кыһалҕалаах кэлбит дьоҥҥо таҥас талан, сүбэлээн, ыйан-кэрдэн биэрэллэр. Бу кииҥҥэ төрдүс сылын үлэлиир Анжелика Никифорова кыра оҕото, сиэнэ суох буолан, күнүн манна атаарар. Дьоҥҥо үтүөнү оҥорортон бу сиргэ үчүгэй суох диэн санаанан салайтарар. Кыыс оҕо, дьахтар таҥаһа эр киһи киэнинээҕэр элбэх диэн волонтер бэлиэтээтэ.

Анжелика Никифорова, волонтёр: «Дьоннор хайдах баарынан аҕалаллар. Бэйэбит сааһылаан наардаан ыйыыбыт. Үксүн дьахтар уонна оҕо таҥаһа. Волонтердуу бэйэ баҕаларынан кэлэллэр, тугу баҕаралларынан көмөлөһөллөр, ким тугу сөбүлүүрүнэн».

Бастаан кэлбит таҥаһы ыйааһыҥҥа уураллар. Ол кэнниттэн волонтердар биирдии-биирдии бэрийэн, туругун бэрибиэркэлииллэр. Арай имиллибит, киһи кэтэриттэн ааспыт туруктаах буоллаҕына, анал байыаннай дьайыыга сылдьар уолаттарга таҥас бытырыыһыттан сиэккэ, сыттык  симиитэ оҥороллор. Онон хас биирдии кэлбит таҥас туһуҕа барар. Ордук тугу аҕалыахха сөбүн киин салайааччыта бэлиэтээтэ.

Максим Тонконог, көмө киин салайааччыта: «Желательно приносить вещи, которые пригодятся. Остро нуждаемся в мужской верхней одежде, в целом мужской одежды мало».

Үтүө дьыала ситимигэр кыттыһыан баҕалаахтары үлэҕэ ыҥыраллар. Оттон бастакы көмөҕө, таҥаска-сапка наадыйар дьону Вилюйский переулок 6-с дьиэтигэр үһүс этээһигэр күүтэллэр.