«Сулустар» ырыа күрэҕин бастакы түһүмэҕэ

Оҕо сааһыттан ырыаны сөбүлүүр дьарык оҥостон кэлбит Петр Пестерев бастакытын улахан сыанаҕа көрөөччү киэҥ араҥатыгар тахсарга холонор. Онон бу Сулустар диэн бырайыак киниэхэ искусство эйгэтигэр суолу арыйара саарбаҕа суох. Петр Пестерев Хаҥалас улууһуттан сылдьар. Мохсоҕоллоох нэһилиэгин култуура киинигэр үлэлиир. Бу күрэххэ бастакы холонуута, онон сүрдээх долгутуулаах диир.

Пётр Пестерев, "Сулустар" өрөспүүбүлүкэтээҕи ырыа күрэҕин кыттааччыта: «Бу күрэҕи эрдэттэн кэтиибин. Быйыл кыттарга саҥа сананным. Уһуйааччылар сүбэ-ама биэрдилэр. Айгылаан талбытыгар үөрдүм. Бу репертуарбар саҥа ырыа».

«Сулустар» диэн өрөспүүбүлүкэтээҕи вокал күрэҕэ “Муус устар” ыччат фестивалын иһинэн номнуо 4 сылын ыытыллар. Ааспыт сылтан кэккэ уларыйыылар киирэннэр, бастаан сүүмэрдиир түһүмэҕи улуустар бэйэлэрэ тэрийэллэр, онтон салгыы кыайыылааҕы Өрөспүүбүлүкэ таһымыгар ыыталлар. Быйыл күрэххэ барыта 15 эдэр ырыаһыт кыттар. Бастакы түһүмэх уһуйааччыны талыы.

Василий Сорокин, "Сулустар"  өрөспүүбүлүкэтээҕи ырыа күрэҕин уһуйааччыта: «Улуустар саамай чаҕылхайдарын ыыталлар. Ол иһин дьоһун кыттааччылар кэлбиттэр. Бастакы кыттааччылар туох буоларын билбэккэ кэлбит буоллахтарына, билигин сыаллаах-соруктаах, билэн көрөн кэлбиттэр дии саныыбын».

Кырдьык да кыттааччылар бары чаҕылхайдар. Мааны куоластаахтарын таһынан, сыанаҕа тутталлара-хапталлара, уобарастарын тиэрдэллэрэ эмиэ туспа талаан. Хас биирдиилэрин толорор ырыалара истээччи кутун таарыйаллар.

Нам улууһун күөрэгэйэ Сайнаара Жмурова уһуйааччылар көрдөһүүлэринэн эт куолаһынан ыллаан иһитиннэрбитин истээччи хабан ылан ытыс тыаһынан доҕуһуоллаабыта күрэххэ биир эмиэ интириэһинэй түгэн буолла. Сайнаара 4 сааһыттан ыллыыр, ол эрэн Петр Пестерев курдук эмиэ сөбүлүүр дьарык эрэ курдук илдьэ сылдьр.

Сайнаара Жмурова, "Сулустар" өрөспүүбүлүкэтээҕи ырыа күрэҕин кыттааччыта: «Ырыа мин сөбүлүүр дьарыгым буолар. Үөрэҕирии салалтатыгар үлэлиибин. Мин саннабар, манна бастакы уочарат дьоннору кытта билсии-көрсүү».

Билигин кыттааччылар бэйэ-бэйэлэрин кытта билсэн салгыы нэдиэлэ устата уһуйааччыларга үөрэниэхтэрэ, вокал уруоктарын ылыахтара, маастар кылаастарга сылдьыахтара. Онтон салгыы дьүүлүүр сүбэ 5 ырыаһыты талыаҕа. Ол кэнниттэн “Муус устар” фестиваль сүрүн тэрээһинигэр кыайыылаах аатын ааттыахтара.