Искэҥ ыарыытын эмтиир саҥа киин бастакы үлэтин күнэ

Саха сирин медицинэтин историятыгар бэлиэ күн. Искэҥ ыарыытын эмтиир үрдүкү кылаастаах киин бастакы үлэтин күнэ. Поликлиника биэс бырааһа сарсыарда 7:30 чаастан номнуо үлэлэрэ саҕаламмыт. Ол курдук 3 онколог быраас, гинеколог уонна маммолог. Бу күн барыта 95 киһи суруттарыылаах. Саҥа кииҥҥэ биир бастакынан Прасковья Кузьмина көрдөрүнэ кэлбит. Кини бастатан туран, быраастар кыһамньылаах сыһыаннарыгар махтанар. 2019 сыллаахтан бу балыыһаҕа көрдөрүнэр, онон саҥа киин аһыллыыта киниэхэ олус суолталааҕын ыйар. 

Прасковья Кузьмина, көрдөрүнээччи: «Өрөспүүбүлүкэбит үрдүнэн олус суолталаах түгэн буолла. Өр сылларга онкологическай диспансер кыра кыараҕас сиргэ үлэлии олорбут буоллаҕына, билигин аныгы оборудованиелаах, киэҥ-куоҥ, ыарыһахтарга табыгастаах саҥа дьиэҕэ көстө».

Кол-киин үлэтэ толору саҕаламмыт. Онон Өрөспүүбүлүкэ хайа баҕар мунугуттан көрдөрүнээччилэри суруйуу бара турар. Саҥа кииҥҥэ амбулатория көмөтүн оҥоруу кээмэйэ улааппыт. Ол курдук сылга 20 тыһыынча киһини көрүөхтэрэ. 

Саҥа киин түөрт блоктан турар,  ыарыыны быһаарар эксперт-кылаастаах тэриллэринэн хааччыллыбыт. Онон искэҥи эрдэ булар кыах баар буолбут. Лаборатория салаатын  күүһэ эмиэ биллэ улааппыт. Эрдэ федеральнай кииҥҥэ ыытыллар анализтары миэстэтигэр оҥоруохтара. Эдэр быраас Варвара Долгунова саҥа кииҥҥэ номнуо үлэлиир миэстэтин оҥостон хаһыс да киһитин көрөр. Оҕо сааһыттан искэҥ курдук ыарахан ыарыылаах дьоҥҥо көмөлөһөр баҕа санаатын толорон үһүс сылын үлэлиир.

Варвара Долгунова, Онкология киинин онколог-бырааһа: «Хас биирдии салаа биир дьиэҕэ баар буолара үчүгэй. Дьоннор ыраах барбакка биир киин иһигэр көрдөрөллөр. Уонна салааларбыт бүгүҥҥү күҥҥэ ынырык элбэх буолбут. Улахан киин буолан оборудованиебыт барыта биир сиргэ буолар, барыта дьон туһугар».

Исписэлиис ахсаана икки төгүл элбээбит. Сылга 4,5 тыһыынча эпэрээссийэни оҥоруохтара. Онон саҥа киин Саха сиригэр онкология ыарыыларын быһаарыыга уонна эмтээһиҥҥэ  баар кыһалҕаларын барытын быһаарар толору кыахтаах. Маныаха анаан быраастар, сиэстэрлэр анал үөрэхтэри аастылар, таһымнарын үрдэттилэр.

Ксения Сивцева, Онкология киинин аҕа сиэстэрэтэ: «Биһиги аҕа сиэстэрэ быһыытынан үрдүк үөрэхтээх дьоннор үлэлиибит. Биһиги пуунсуйабыт элбэх, быраастары кытта тэбис тэҥҥэ үлэлиибит. Кол-киин, регистратура уонна транспортнай биригээдэни кытта холбоон үлэлиибит».

Поликлиника ыарыһахтарга табыгастаах буоллун диэн аа-дьуо көһүө. Онон урукку балыыһаҕа көрдөрүнүү тэҥинэн барар. Онтон диспансер бэйэтэ эмиэ сотору кэминэн саҥа кииҥҥэ толору үлэтин саҕалыа.