Мэҥэ Хаҥалас улууһугар тулаайах оҕолорго анаммыт дьиэ аанын аста

Аллараа Бэстээххэ бэлиэ түгэн. Толору хааччылыылаах икки саҥа дьиэ аанын тэлэччи аста. Тулаайах, итиэннэ төрөппүт көрүүтэ-истиитэ суох хаалбыт оҕолору дьиэнэн-уотунан хааччыйыы бырагырааматын чэрчитинэн 8 эдэр дьон дьиэлэнэр дьолу биллэ. Олор истэригэр 22 саастаах Эдуард Слепцов киирдэ. Эдуард өр күүппүт бэйэ дьиэлэнэр ыра санаам туолла, онон махталбын дойду Президенигэр, Ил Дархаҥҥа биллэрэбин диэн этэр.

Эдуард Слепцов, Мэҥэ Хаҥалас улууһун олохтооҕо: «Бэйэм лаппы үөрдүм. Дьиэ сылаас, үчүгэй оҥоһуулаах. Өр күүппүт күнүм бугун тиийэн кэллэ».

Бэлиэ тэрээһиҥҥэ РФ генеральнай прокурорун солбуйааччы Дмитрий Демешин уонна Ил Дархан Айсен Николаев кытыннылар.

Ил Дархан дойду Президенэ Владимир Путин тулаайахтары уонна төрөппүт көрүүтэ-истиитэ суох хаалбыт оҕолору дьиэнэн-уотунан хааччыйыы боппуруоһун ураты хонтуруолга тутарын, туһааннаах уорганнар сокуоннай саастарын ситэ илик оҕолор бырааптарын көмүскээһиҥҥэ улахан болҕомтолорун уураллаларын бэлиэтээтэ. Саха сиригэр бу үлэ тиһиктээхтик ыытыллар, тулаайах оҕолор олорор дьиэлэрин, дьиэ сэртипикээтин ылар бырааптарын тутуу бэрэбиэркэлэнэр диэн эттэ.

Иван Никифоров, тутар хампаанньа салайааччытын солбуйааччы: «Хантараакпытынан кыбартыыралар 33 кв.м. тахса. Таһын тупсарыытын бүтэриэхпит. Оҕо былаһааккалаах, күөх үүнээйилээх, аспаал киирэр суоллаах буолуохтаах. Саҥа ирдэбиллэри тутуһан тутуллубут дьиэни бүтэрэн, бу арыллар үөрүүлээх күнүгэр кэлэн турабыт».

Дьиэ монолит-каркас тутуулаах, автономнай ититэрдээх, толору хааччыллыылаах, итии, тымныы уулаах, куукунаҕа уотунан холбонор духуопкалаах, гаас билиитэлээх. Бу дьиэлэри “Арктика Строй” диэн олохтох тэрилтэ сыл аҥара кэм иһигэр тутан бүтэрэн үлэҕэ киллэрдэ. Ааспыт 2023 сыллаахха тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыыга уопсайа 50-чэ кэриҥэ мөлүйүөн үбү Өрөспүүбүлүкэ бүддьүөтүттэн көрбүттэрэ. Үп-харчы иккис ырыынактан уон үс кыбартыыраны атыылаһыыга ыытыллыбыта.

Дмитрий Демешин, РФ генеральнай прокурорун солбуйааччы: «Прокуратура плотно сопровождала эти проекты. Максим Николаевич Попов - прокурор республики контролировал сдачу домов и мерами прокурорского реагирования мы воздействовали на подрядчиков, контролировали сроки, качество исполнения».

Оттон ааспыт сылга Саха сирин үрдүнэн уопсайа 161 тулаайах оҕоҕо 640 мөл. суумалаах дьиэ сэртипикээтин туттарбыттара. Бастакы ырыынакка 388 мөл. суумаҕа 163 муниципальнай хантараак түһэрсибиттэрэ, оттон итиэннэ иккис ырыынакка 316 мөл. кыбартыыра атыылаһыыга сүүс хантараак түһэрсибиттэрэ. Үүммүт сылга былааннаммыт үлэ салҕанан барыаҕа.