Саха сиригэр хайа да сыллааҕар элбэх тутуу үлэҕэ киирдэ

Аалай лиэнтэ быһыллар, оскуола бастыҥ спортсменнара парадтаан киирэллэр. Дьокуускай 20№-дээх оскуолатыгар күүтүүлээх спортивнай саала арылынна. Үгүс сылларга оҕону эт-хаан өттүнэн сайыннарыыга ыарахаттары көрсүбүт үөрэх кыһата "Уһук илиҥҥэ 50 спорт саала" бырагыраама чэрчитинэн саалаланна.   

 

Андрей Новоприезжий, Дьокуускай 10 №-дээх оскуолатын дириэктэрэ: “Физкультура уруогар оҕолор “Дохсуҥҥа” баран дьарыктаналлар этэ. Билигин бэйэбит саалаланныбыт. Манна уруоктар, секциялар буолуохтара уонна дойдуга бэриниилээх буолуу дьарыктара ыытыллыахтара”.

 

Тутуу ааспыт саас саҕаламмыт. Түргэн ньыманан оҥоһуллубут буолан ахсынньыга түмүктэммит. Онон үөрэнээччилэр номнуо бэйэ саалатыгар дьарыктары саҕалаабыттар. Элбэх спортменнаах оскуолаҕа көрдөрүү өссө тупсарыгар сөптөөх усулуобуйа тэриллэн учууталлар да үөрэнээччилэр да үөрүүлэрэ улахан.   

 

Айтал Христофоров, Дьокуускай 10 №-дээх оскуолатын үөрэнээччитэ: “Саалабыт улахан, онон дьарыктанарга быдан табыгастаах. Оҕолор араас спорт көрүҥнэринэн эрчиллиэхтэрэ ”.

 

Эбийиэк уопсай үбүлээһинэ 40 мөлүйүөн. Бу күн оруобуна маннык саала Дьокуускай куорат 10№-дээх оскуолатыгар эмиэ арылынна.

 

Саха сиригэр 23 сылга 705 тыһыынча кв миэтэрэ тутуллубут. Бу көрдөрүү хайа да сыллааҕар элбэх. Онон өрөспүүбүлүкэҕэ тохсунньу малааһыннарынан баай ый буолла. Икки оскуола, икки спорт саала арылыннылар.

 

Өссө биир саҥа эбийиэк. Чурапчыга дьиэ кэргэҥҥэ элбэх өҥөнү оҥорор киин. Саха сирэ дойду пилотнай бырайыагар киирсэн биир бастакынан үлэни саҕалаата. Бастакы киин арыллыытыгар Ил Дархан Айсен Николаев кыттыыны ылла.  

 

Айсен Николаев, Ил Дархан: “Бу элбэх өҥөнү оҥорор киин уратыта диэн манна, кырдьыктыы бары бииргэ холбоһоммут, федеральнай киин, өрөспүүбүлүкэ Бырабыыталыстыбата, улуус салалтата бары күүспүтүн түмэммит бэрт кылгас кэмҥэ, Россия үрдүнэн саҕаламмыт пилотнай бырайыакка киирэммит, бэртээхэй дьиэ оҥоһуллан үлэҕэ киирбититтэн наһаа үөрэбин”. 

 

3 этээстээх дьиэҕэ докумуону тутууттан саҕалаан олох ыарахаттарыгар түбэспит ыалга үгүс өрүттээх көмөнү оҥорууга тиийэ араас өҥөлөр оҥоһуллаллар. Холобура, доруобуйатынан хааччахтаах оҕолору чөлүгэр түһэрии, эдэр ийэлэргэ көмөлөр, олох ыарахаттарыгар түбэспит ыалы өйөөһүн, уһун үйэлэнии киинэ.  

 

Мария Саввина, Чурапчытааҕы дьиэ кэргэҥҥэ элбэх өҥөнү оҥорор киин дириэктэрэ: “Биһиэхэ кэлбит киһи бу дьиэттэн кыһалҕатын, боппуростарын барытын быһааттаран тахсан барыахтаах”.

 

Саҥа кииҥҥэ номнуо бастакы өҥөнү ылааччылар кэлбиттэр. Кырачааннары реабилитациялыыр салаа туһааннаах тэрилинэн хааччыллан, толору үлэлии турар.

 

Ньургуһун Слепцова, Чурапчытааҕы дьиэ кэргэҥҥэ элбэх өҥөнү оҥорор киин үлэһитэ: “Манна доруобуйаларынан хааччахтаах оҕолор дьарыктаналлар. Холобура, бу сенсорнай - динамическай саала дэнэр”.

 

Дойдуга дьиэ кэргэн сылыгар маннык киин арыллыыта тоҕоостоох. Оруобуна бу курдук киин кулун тутарга Намҥа үлэлээн саҕалыаҕа итиэннэ Оҕо көмүскэлин күнүгэр Дьокуускайга. Ил Дархан Чурапчыга сырыытыгар "Инникигэ хардыы" научнай - практическай конференция кыайыылаахтарын кытта аанаан-минээн көрүстэ. Гимназия үөрэнээччилэрэ киһи доруобуйатын туругун быһаарар аппарааттан саҕалаан Новгородов алфавитын тылбаасчытыгар тиийэ оҥорбуттарын көрдөрдүлэр.   

 

Онтон тутууга төнүннэххэ, быйыл саха сиригэр 30 социальнай эбийиэк үлэҕэ киириэҕэ. Ол иһигэр 13 оскуола уонна 4 уһуйаан.