Кус – хаас болдьоҕор уларыйыы киириэ

"Авиалесоохрана" салайааччыта Владимир Леонов бэлиэтииринэн, ааспыт сылы 2022 сылы кытары тэҥниир эбит буоллахха ойуур баһаарын ахсаана 40% элбээтэ. Билигин өрөспүүбүлүкэбитигэр эбии үөрэҕи 28 парашютист ааһа сылдьар. Кэлэр ыйтан кинилэр уопсай ахсааннара 200-чэ киһиэхэ тэҥнэһиэ. Оттон көтөр аалы ыытар лүөччүктэр эмиэ үөрэҕи ааһаллар, балар ахсааннара 40 буолуохтаах.

Владимир Леонов, "Авиалесоохрана" тэрилтэ салайааччыта: “Ааспыт сылга Арктика зонатыгар авиа салаалары арыйбыппыт. Ол курдук  Зырянкаҕа, Томторго. Авиа салаа суох улуустарыгар биһиги уоту муруорбаппыт диэн буолбатах. Нэһилиэнньэлээх пууннарга, экономика эбийиэктэригэр куттал суоһаабатын инниттэн  Саха сирин хайа баҕар муннугар баһаары тохтотууга үлэлиибит.”

Дойду үрдүнэн айылҕа баайын туһаныыга кэккэ уларыйыылар тахсаннар, аҥаардас Алдан улууһугар көмүһү хостуур тэрилтэлэртэн ууну киртитиигэ 17 кэһии булулунна. Мантан түөрдэ ыстарааптанна. Бу туһунан Алданнааҕы айылҕа кэмитиэтин салайааччыта иһитиннэрдэ.

Семён Заровняев, Алданнааҕы айылҕа харыстабылын кэмитиэтин салайааччыта: «Бу сылга биһиги сэрэтии үлэтин күүһүрдүөхтээхпит. Көмүсчүттэри, урбаанньыттары кытары көрсөммүт сокуону кэһимэҥ диэн кэпсиэхтээхпит».

Саха өрөспүүбүлүкэтигэр кыыл төрөөһүнэ элбээн тайахха, кулааһайга бултааһын ахсаана икки төгүл элбээтэ. Урукку сылларга 2,5 тыһыынча эбит буоллаҕына ааспыт сылтан тайахха бултааһын 4,5 тыһыынча тиийэ көҥүллэннэ. Адьырҕа кыылы бултааһыҥҥа эмиэ өйөбүл улахан. Ол курдук хас биирдии бөрө төбөтүгэр өрөспүүбүлүкэ 30 тыһ. солк. булчукка көрүөҕэ. Ону таһынан улуустар эмиэ биирдиилээн төлөһөллөр. Онтон кус-хаас булдугар эмиэ уларыйыы баар.

Николай Додохов, СӨ экология, айылҕа баайын туһаныы уонна ойуур хаһаайыстыбатын миниистирин солбуйааччы: “Биһиги хааска 3 күнү уонна куска 7 күнү араарааччыбыт. Ону былырыыҥҥы диэри араартарбатахтара. Онтон быйылгы бэлэмнэнэ сылдьар бирикээскэ араарыаххытын сөп диэн киирэ сылдьар. Онон ол докумуон баттаннаҕына тус  туһунан болдьох оҥоруохпут”.

Дойду үрдүнэн Экология уонна айылҕа баайын туһаныы министиэристибэтэ туйахтаах кыылларга тохсунньу 10 күнүгэр диэри бултаһарга көҥүлү биэрбитэ. Оттон Саха өрөспүүбүлүкэтин министиэристибэтэ ити сокуону төттөрү ахсынньы 25 күнүгэр диэри уларытарга этии киллэриэҕэ. Тоҕо диэтэххэ тымныы күн турдаҕына, кыыл барыта аһаҕас сиргэ тахсара биллэр суол.

23 сыл иһигэр көҥүлэ суох 111 бөх тоҕор сир суох оҥоһулунна. Ордук Дьокуускай уонна Нерюнгри куораттарга үлэ күүскэ ыытылынна. Оттон булка көҥүлү уонна да атын болдьоҕу ылыыга туох уларыйыы киирбитин миниистир солбуйааччыта иһитиннэрдэ.

Дьулустан Хон, СӨ экология, айылҕа баайын туһаныы уонна ойуур хаһаайыстыбатын миниистирин солбуйааччыта: «Бу сылтан булчуттар хайа баҕар көҥүлү туһааннаах сайт нөҥүө электронно ылалларын ситиһиэхтээхпит».

Саха өрөспүүбүлүкэтэ 2023 сыл түмүгүнэн дойду ыытар "Вода России" аахсыйатыгар 9 миэстэттэн 7 миэстэҕэ тахсары ситистэ. 24 сылга 5 бастыҥ регион иһигэр киирэри былаанныыр.