Павловскайга үүт собуота кыһыннары тигинэччи үлэлиир

Собуот үлэтэ сайыннары кыһыннары күөстүү оргуйан олорор. Кэпэрэтиип тутаах үлэһитэ, технолог Айталина Владимирова собуокка үлэлээбитэ быданнаата. Оҥоһуллан тахсар үрүҥ ас барыта кини сытыы хонтуруолунан ааһар. Биир сыл иһигэр 45 туонна арыыны, 67 туонна суораты, кефиры оҥорон таһаардылар. Инникитин ас көрүҥүн дэлэтэр, собуоттарын саҥардар баҕа санаалаахтар. Сэттэ сыл устата Майатааҕы үүт кэмбинээт кэпэриитибин кытта дуогабардаһан олорбуттара. Билигин дуогабардара бүтэн, бэйэлэрэ тэринэн олорор собуот буоллулар.

Айталина Владимирова, Павловскайдааҕы үүт собуотун технолога: "Собуоппут таһын өрөмүөннээбиппит бэйэбит күүспүтүнэн. Оборудованиеларбыт бырагырааманан 2012 сыллаахха кэлбиттэрэ. Эргэрдилэр. Ону бырагыраамаҕа киллэрэн сыл аайы биирдиилээн иккилиилээн уларытан иһиэхпит".

Бу собуот 2011 сыллаахха арыллыбыта. 23 сыллаахха тыа хаһаайыстыбатын министиэристибэтэ уонна Мэҥэ Хаҥаластааҕы улуус дьаһалтата көмөлөрүнэн собуот бэйэ бас билиитигэр көстө. Саҥардыы үлэтэ номнуо ыытыллан саҕалаата. Ахсынньы-тохсунньу ыйдарга үүт саамай аччаан турар кэминэн биллэр, ол иһин собуот күн өрүү-өрүү үлэлиир.

Былырыыҥҥыттан өрөспүүбүлүкэ дьаһалтата үүт собуотугар сухуой үүтү көрөн, дьыл кэмиттэн тутулуга суох собуот үлэтин тохтоппокко, эргинэн олорор. Үүт сүүрбэт күнүгэр бороһуок үүтү чөлүгэр түһэрэллэр. 23 сылга биир туонна сухуой үүтү оҥорон таһаарбыт эбит буоллахтарына, быйылгы сыл 4 туонна үүтү сайаапкалаан олороллор. Дьон-сэргэ бороһуок үүтү ылыммат, сыыһа өйдүүр түгэннэрдээх диэн собуот бэрэссэдээтэлэ бэлиэтээтэ.

Елена Оконешникова, Павловскайдааҕы үүт собуотун бэрэссэдээтэлэ: "Бороһуогунан бороһуок гынан баран үчүгэй хаачыстыбалаах үүттэн оҥорон таһаараллар. Дьон өйдүөн наада үүтү бороһуокка кубулутааһын диэн".

9 нэһилиэктэн кэлбит үүтү бастаан тута анаалыстыыллар. Көрдөрүүтэ барыта сөп түбэһэр, ас оҥоһуллан тахсар кыахтаах буоллаҕына эрэ үүтү туталлар. Билигин үүт сыата 4-тэн 4 сыалай 3-кэ диэри халбаҥныыр.

Сардаана Стручкова, Павловскайдааҕы үүт собуотун лаборана: "Туттарыыга кэлбит үүтү аан бастаан анализтыыбыт. Ол эрэ кэннэ оҥорон таһаарыыга барар".

Олохтоохтор уонна чугас эргин сытар улуустар Павловскайдааҕы үүт собуота оҥорон таһаарар аһын куруук үрдүктүк сыаналыыллар. Быйылгы сылтан ас көрүҥүн дэлэтэр, собуоттарын иһин саҥардар былааннаахтар.