Ойуулуур-дьүһүннүүр түмэл маастар – кылаастары ыытар
Семен Нучеканов хас биирдии киһини кэрийэ сылдьан уруһуй кистэлэҥин арыйар. Уопуттаах худуоһунньук сатабыллаах салайыытынан маастар кылааска кэлбит дьон айылҕа кэрэ көстүүтүн, аан дойду аатырбыт хартыыналарын үтүктэллэр, көҥүл да тиэмэҕэ холоноллор. Саһа сылдьыбыт талааны уһугуннаран, кэрэ көстүү алыптаах эйгэтигэр умсаллар, искусства живопись курдук уустук көрүҥүн баһылыыллар. Урут сатаабатахтарын, ситиспэтэхтэрин холоноллор.
Семён Нучеканов, худуоһунньук: «Бу маастар-кылааска уруһуйдуон баҕалаах дьону мин хас биирдиилэрин үөрэтэбин. Тугу уруһуйдуулларын бэйэлэрэ талаллар. Оннук эмиэ интэриэһинэй».
Уруһуй дьоҕурун арыйарга, холкутук үөрэнэргэ түргэнник хатар кырааска ордук барсар. Саҥа саҕалааччылар акрил кыраасканы туһаналлар. Сыта-сымара суох, өҥү биэрэрэ да, көстөрө да бары өттүнэн табыгастаах. Холобур, Сардаана Новикова оҕо эрдэҕиттэн уруһуйдуур баҕатын толорон маастар-кылааска номнуо иккис сырыыта. Айылҕа кэрэ көстүүтүн, үүнээйилэри кэрэхсиир буолан, уруһуйдуур да хартыыната оннук.
Сардаана Новикова: «Уруһуйдуур үчүгэй эбит, олус сөбүлээтим. Сибэкки оҥоро сылдьабын, ааспыкка эмиэ сибэкки уруһуйдаабытым. Дьиэбэр ыйаарыбын. Бу курдук маастар-кылаастры оҥорор буолбуттары олус үчүгэй».
Маастар-кылаастар хас быраһынньык, бэлиэ күн аайы буолаллар. Итиэннэ олохтоох дьон баҕаларынан үлэ да күнүгэр тустаах тэрээһиннэри оҥороллор. Нэһилиэнньэ көхтөөх араҥата номнуо хартыынаны уруһуйдуур тиэхиникэни баһылаан сынньалаҥнарын туһалаахтык атаараллар. Бэйэлэрин толкуйдарын, сөбүлүү көрбүт көстүүлэрин хартыынаҕа түһэрэн үйэтитэллэр. Ыра санаа, санаа күүһэ баар буолан бу дьону ким да, туох да тохтоппот, санааларын самнарбат.
Семён Нучеканов, худуоһунньук: «Хаста да сырыттахтарына илиилэрэ бара үөрэнэн уруһуйдуур буолаллар. Барыта киһи баҕатыттан тутулуктаах».
Бу курдук киин куорат биир киэһээҥҥи хартыыната. Сынньалаҥ туһалаах көстүүтэ. Нэһилиэнньэ күннээҕи олох түбүгүттэн сынньана, аралдьыйа искусство кэрэ эйгэтигэр умсар. Дьоҕурдарын арыйаллар, сатабылларын чочуйаллар.