1№-дээх оҕо спордун оскуолатыгар төгүрүк сыл аан аһаҕас

Кытыгырас атахтаах, кырачаан уолаттар уонна кыргыттар эттэрин-сииннэрин эрчийэр баҕаттан тренердэрин болҕойон истэллэр, кыһамньылаахтык дьарыктаналлар. Төрдүс кылаас үөрэнээччитэ Саина Васильева  1№-дээх  оҕо спордун оскуолатыгар уруоктарын кэннэ биир да күнү көтүппэккэ чэпчэки атлетиканан эппиэтинэстээхтик дьарыктана кэлэр. Кырачаан кыыс улааттахпына олимпийскай чемпион үрдүк аатын сүгүөхпүн баҕарабын диэн баҕа санаатын аһаҕастык этэр.

Саина Васильева, Дьокуускайдааҕы национальнай гимназия төрдүс кылааһын үөрэнээччитэ: "Манна дьарыктанарбын олус сөбүлүүбүн. Улааттахпына үчүгэй спортсмен буолар баҕалаахпын".

Дьокуускайга эрэ буолбакка кэнники кэмҥэ бүтүн өрөспүүбүлүкэ үрдүнэн оҕо  спорт эйгэтигэр үрдүк ситиһиилэри дабайарыгар сөптөөх усулуобуйа оҥоһуллар. Күнтэн күн оҕо спорда сайдан иһэр диэн тренердэр үөрэ саныыллар. Виктор Колесов бэйэтэ араас таһымнаах күрэхтэргэ үгүс ситиһиилэрдээх. Тренер  бэйэтин билиитин-көрүүтүн эдэр көлүөнэҕэ тириэрдэр кыахтааҕын билэр уонна уһуйааччы быһыытынан номнуо иккис сылын үлэлии сылдьар.

Виктор Колесов, уһуйааччы-тренер: "Усулуобуйабыт олус үчүгэй. Сорох оҕолорбутун улахан манежка “Триумфка” дьарыктыыбыт. Манна бэйэбитигэр дьарыктанар саалалаахпыт, оонньуур саала эмиэ баар. Алын кылаас оҕолоругар ооньуур саала олус суолталаах".

Уопуттаах тренердэр аныгы интернет, фастфут үйэтигэр улаатар оҕолор көрдөрүүлэрэ, доруобуйаларын да таһыма арыыйда уруккутунааҕар мөлтөх диэн бэлиэтээн этэллэр. Ол иһин оҕону кыра эрдэҕиттэн эрчийиэххэ, спорт эйгэтигэр сыһыарыахха наада диэн төрөппүттэргэ сүбэлииллэр.

Василий Алексеев, үрдүк категориялаах тренер: "Билигин аспыт мөлтөх. Ол барыта оҕо эт-хаан өттүнэн сайдыытыгар мэһэйдиир".

1№-дээх оҕо спордун оскуолатыгар саҥа иитиллээччилэргэ төгүрүк сыл устата аан аһаҕас, санныларыгар үгүс уопуттаах уһуйааччылар үүнэн эрэр көлүөнэ сайдарын туһугар куруук үлэ үгэнигэр сылдьаллар. Билигин кинилэр  иитиллээччилэрэ "Азия оҕолоро” күрэххэ күн өрөбүлэ суох дьаныардаахтык бэлэмэнэнэллэр.