Саха сиригэр 10-тан тахса медицинэ тэрилтэтэ гепатит ыарыыны эмтииргэ көҥүл ылла

Гепатит курдук ыарахан ыарыыттан эмтэнии арыый да судургутуйда. Ол курдук Саха сиригэр 10 тахса медицинэ тэрилтэтэ бу ыарыыны эмтииргэ көҥүл ыллылар. Олор истэригэр өрөспүүбүлүкэтээҕи Спид киинэ. С, В гепатиттары бу кииҥҥэ 2009 сылтан эмтииллэр. Онтон билигин күнүскү стационар федеральнай бырагыраамаҕа киирэн  хабар дьонун ахсаана элбээтэ, оҥорор өҥөтө хаҥаата.  

Александра Золотарёва, СӨ СПИД киинин кылаабынай бырааһа: «Ааспыт нэдиэлэттэн номнуо бастакы ыарыһахтары эмтээтибит. Онтон ураты биһиги телемедицинскай сүбэлээһин киллэрдибит. Ыраах оройуннарга олорор ыарыһахтары эмтиир быраастарга сүбэ буолабыт».

Спид киинигэр гепатит ыарыыттан эмтэнээри Өрөспүүбүлүкэ араас муннуктарыттан кэлэллэр. Булуҥ улууһуттан кэлэн күнүскү стационарга туһааннаах эмтэниини ылар. 

Антонина Петрова, эмтэнээччи: «Үчүгэйдик эмтииллэр. Саҥа босхо эмп анаатылар, 28 күн уколланабыт онтон анализ туттарабыт».

Күн бүгүн Саха сиригэр гепатит учуотугар 15 тыһыынчаттан тахса киһи турар. Мантан 6 тыһыынчата В, онтон 7 тыһыынчата С уоннааҕыта Д диэн саамай уустук көрөүҥүнэн ыалдьаллар. Эмтээһин федеральнай быраагыраама чэрчитинэн булгуччулаах медицинскэй страховка нөҥүө ыытыллар. Ол курдук ыарыыны эрдэттэн быһаарар сыалтан араас бэрэбиэркэлиир акциялар, диспанцеризациялар бараллар. 

Снежана Слепцова, СӨ сүрүн инфекционист бырааһа: «Эмтиир дьоннорбутун элбэтэн. Быйыл холобур, тыһынчаттан тахса киһини эмтээри былааннана сылдьабыт. 10-тан тахса тэрилтэ көҥүл ылбыта босхо ОМСынан гепатит эмтииргэ. Ол тэрилтэлэргэ бу СПИД киинэ эмиэ киирэр. 4 улууска эмиэ улахан балыыһалар көҥүл ыланнар эмтииргэ бэлэмнэнэ сылдьаллар. Мииринэй, Таатта, Сунтаар уонна Чурапчы улуустара».

Гепатит көрүҥүттэн көрөн эмтээһин 3 ыйтан саҕалаан биир сылга диэри салҕанар. Бу кэм устата биир күнү көтүппэккэ күнүскү стационарга туһааннаах эмтэниини ылыахха наада. Манна  ыарыһахтар туох баар оҥоһуллар өҥөнү босхо туһаналлар. Холобура, бу быар кытаатыытын быһарар гепатиты эмтээһиҥҥэ олус туһалаах аппараакка бу күһүҥҥэттэн босхо түһэриллэр буолбут.

Валентина Кулагина, СӨ СПИД киинин бырааһа: «Бу тэрил хайдах эмтэниэхтээхтэрин быһаарарга көмөлөһөр».

Гепатит ыарыытын сэрэтэр уонна эрдэттэн быһаарар туһуттан ааспыт сылтан үлэлиир "мобильнай доктор" бырайыакка гепатолог быраас сылдьыһар. Ол түмүгэр 20 тахса киһини эмтэниигэ ыллылар. Онон гепатиты утары үлэ Өрөспүүбүлүкэҕэ бу сылтан сытыырхайда.