ХИФУ-га үрдүк үөрэхтэр дьаарбаҥкалара буолла

Вероника Собакина орто анал үөрэҕин бүтэрэрэ чугаһаан, салгыы үрдүк үөрэххэ киирэн билиитин эбии ханатар баҕаттан профориентационнай «Вперед на вышку!» диэн дьаарбаҥкаҕа ыалдьыттыы сылдьар. Устудьуон кыыс этэринэн, үөрэх көрдөнөр киһиэхэ бэрт табыгастаах тэрээһин буола турар, кэлбититтэн кэмсиммэтэх.

Вероника Собакина, орто анал үөрэх кыһатын устудьуона: «Мин үрдүк үөрэхтэри көрө кэллим. Бу бүтэрэр үөрэҕим кэннэ киирэн үрдэтинээри. Маннык дьаарбаҥка туһалаах диэн саныыбын, тоҕо диэтэр мин идэбинэн барыллаан ханнык направлениелары таларбын көрүөхпүн сөп».

Үрдүк үөрэххэ идэни талыы бэрт эппиэтинэстээх, элбэх бириэмэни эрэйэр буолан Хотугулуу-илиҥҥи федеральнай университет эрдэттэн, тохсунньу ыйтан саҕалаан эһиилги үөрэх дьыла саҕаланыар диэри абитуриеннарга араас профориентационнай тэрээһиннэри ыытар. Абитуриеннары кытта алтыһар үлэҕэ устудьуоннар эмиэ күүс-көмө буолаллар.

Ариан Аммосов, ХИФУ юридическай бакылтыатын 2 кууруһун устудьуона: «Бүгүҥҥү тэрээһиҥҥэ мин юридическай факультет туһунан кэпсиибин. Абитуриеннар эбэтэр оскуоланы бүтэрээри сылдьар оҕолор кэлэннэр биһиги бакылтыаппыт тугун хайдаҕын, хайдах онно киириэххэ сөбүн ыйыталаһаллар. Оннук боппуруостары хоруйдуурга преподавательга көмөлөһөбүн».

Урукку сыллары кытта тэҥнээн көрдөххө орто анал үөрэх кэннэ үрдүк үөрэххэ туттарсыы ахсаана элбээбит диэн тутар хамыыһыйа үлэһиттэрэ бэлиэтээн этэллэр.

Елизавета Ильина, «Вперед на ВЫШКУ!» дьаарбаҥка тэрийээччитэ: «Статистиканы көрдөххө 2012 сылтан орто анал уорэх кэннэ үрдүк уорэххэ туттарсыы ахсаана сылтан сыл элбээн иһэр. Холобур, уруккута 5-6% буолар буоллаҕына, кэнники сылларга 50% диэри тиийэ бакалавриат уонна специалитет таһымнарыгар киирбит оҕолор бары орто үөрэх кэнниттэн кэлэллэр. Дьаарбаҥканы билигин орто үөрэх кыһаларын үөрэнээччилэригэр ыыта сылдьабыт, тоҕо диэтэргин бу кэнниттэн кинилэр сорохторо номнуо тохсунньуга практикаларыгар бараллар».

Оскуолаларын бүтэрээри сылдьар оҕолорго бу курдук тэрээһиннэри кулун тутар ыйтан саҕалаан ыытар былааннаахтар, ону таһынан абитуриент буолуон баҕалаахтарга араас кампуснай экскурсиялар тохтоло суох сыл устата ыытыллаллар.