Өрөспүүбүлүкэ киинэ тыйаатырдарыгар «Тимир» диэн ааттаах саҥа киинэ тахсар

Аҕа уонна оҕо кыһалҕата. Күн сарсыҥҥыттан Өрөспүүбүлүкэ бары киинэ тыйаатырдарыгар «Тимир» диэн ааттаах саҥа комедийнай драма сүрэхтэниэҕэ. Онтон бу киинэттэн көрөөччүлэр тугу көһүтүөхтэрэй.

Аҥардас киинэ трейлерэ бастакы сөкүүндэттэн киһи болҕомтотун тута тардар. Саҥа сахалыы трагикомедия жанрдаах драма улахан экрааннарга. Кырачаан Тимир Атласов дьылҕатын туһунан киинэ - көрөөччүгэ умнуллубаттаахтык өйдөнөн хаалара саарбаҕа суох. Оттон бу саҥа буруолуу сылдьар киинэни, Горнай улууһуттан төрүттээх Николай Корякин айан-тутан таһаарда. Эдэр киһи улахан метрга бастакы холонуута.

Николай Корякин, киинэ режиссёра: «Устуу сүрдээх бэһиэлэйдик, элэккэйдик ааспыта. Хамаандаҕа олох харахтара умайа сылдьар дьону хомуйбуппут. Уопуттаах артыыстары даҕаны, хаһан да киинэҕэ үлэлии илик оҕолору даҕаны ылбыппыт. Онон уопут да өттүнэн, энтузиазм да өттүнэн барыта баар этэ. Киинэ сүрүн сыала оҕо иитиитигэр аҕа оруолун боппуруоһа».

Чахчы, киинэ олохпут социальнай, тыын суолталаах боппуруостарын арыйар сыаллаах уһуллунна диэн режиссер тоһоҕолоон этэр. Манна олох уопуттаах маастардары кытары, олох эдэр артыыстар уһулуннуллар. Холобура, Тимир аҕатын оруолун, биһиги бары сөбүлүүр артыыспыт, Үүнэр көлүөнэ тыйаатырын тумус туттар уола Георгий Бессонов толордо.

Георгий Бессонов, сүрүн оруолу толорооччу: «Билигин субу-субу аҕалары оонньуур буолан эрэбин – бириэмэтэ кэллэ быһылаах. Киинэҕэ көрөөрүн хайдах аҕабын. Эмиэ куһаҕан киһи дииргит буолуо. Киинэбит бэйэтэ улахан миэтэрэ, комедия, драма. Бырайыактарга үлэлиир буоллахпына эбэһээт сценарийын бастаан ааҕааччым-көрөөччүм уонна хамаандатын хайдах үлэлиирин ыйыталаһааччым. Бу киинэ сценарийын ааҕан бараммын сөбүлээбитим уонна кимнээҕи кытта үлэлиигиний, операторын кимий диэн ыйыталаһан, билсэн-көрсөн бараммын бу бырайыакка сөбүлэммин киирбитим».

Киинэ 22 устар күн устата уһуллубут. Туруорааччы - оператор эдэр эрчимнээх Андрей Егоров, киинэни таҥан оҥордо Константин Сыромятников. Саха киинэтигэр биллэр композитор Моисей Кобяков киинэ доҕуһуолун, ырыатын суруйда. Уопсайынан эргиччи талааннаах дьон манна улэлэстилэр.

Василий Слепцов, устар бөлөх үлэһитэ: «Иллээх көхтөөх коллектив этилэр. Уопуттаах да, уопута да суох дьоннор баар этилэр. Ким эрэ тугу эрэ билбэт буоллаҕына кэлэн кыбыстыбакка ыйыталаһан иһэр буолан үчүгэй баҕайытык түмсүүлээхтик сылдьыбыппыт. Оҕо лааҕырын курдук уопсайга олорбуппут».

Олус интириэһинэй ис хоһоонноох, эдэрдии тыыннаах, саҥа буруолуу сылдьар «Тимир» киинэни көтүтүмэҥ.