Дойду бастыҥ саахымаччыттарын түмэр тэрээһин аһылынна

Өрөспүүбүлүкэ ойуулуур - дьүһүннүүр бас түмэлэ сытыы киирсиилээх саахымат хонуутугар кубулуйда. Искусство чулуу айымньыларын аттыларыгар Ил Дархан Куубага иккис төгүлүн ыытыллар. Быйыл кыттааччы элбээн уонна таһымнара үрдээн тыҥааһыннаах киирсиилэр күүтэллэр.

Гаврил Винокуров, саахымакка Ил Дархан Куубагын судьуйата: «12 Арассыыйа регионнарыттан уонна Сахабыт сирин саамай күүстээх оонньоччулара күөн-көрсүһүөхтэрэ. Биһи дьоннорбут ортолоругар 22 маастарга кандидаттар уонна 4 бастакы разрядтаах, кандидатка тахсыан сөптөөх дьоннор».

Турнирга сүүмэрдээһин саахымаччыттар таһымнарынан көрөн ыытыллыбыт. Маныаха спортсмен бары кыайыылара учуоттанар. Онон бастыҥтан бастыҥнар түмсүбүттэрэ саарбаҕа суох. Саха сириттэн Дьокуускай куорат, Амма, Хаҥалас, Мииринэй бэрэстэбиитэллэрэ кыттыыны ылаллар. Николай Капитонов оҕо эрдэҕиттэн бу көрүгүнэн үлүһүйэн туран дьарыктанар, онтон билигин Дьокуускайга дуобат уонна саахымат киинигэр оҕолору эрчийэр. Кини таһымнаах саахымаччыт буолан Ил Дархан Куубагар иккис төгүлүн кыттар.

Николай Капитонов, саахымакка Ил Дархан Куубагын кыттыылааҕа: «Саха сирэ саамай күүстэх састаабынан оонньуур. Өрөспүүбүлүкэ 2 чемпионнара бааллар – Дмитрий Егоров уонна Денис Назаров. Сылы быһа бэлэмнэннибит күрэххэ».

Быйылгы күрэхтэһиигэ барыта 57 киһи кыттыаҕа. Балар истэригэр 6 гроссмейстер, сэттэ аан дойду маастара бааллар. Олортон биирдэстэрэ аан дойду таһымнаах гроссмейстер Антон Шомоев. Кини эмиэ иккис сырыытын кыттар. Турнир таһыма үрдүгүн бэлиэтиир.

Антон Шомоев, саахымакка аан дойду гроссмейстера: «Играем в прекрасных условиях. Это действительно, большая эстетика, когда находишься в музее, где красивые картины и дух шахмат связан с искусством. Это очень приятно».

Ааттаах - суоллаах саахымаччыттары тэҥэ турнига бу сайын ыытыллыахтаах "Азия оҕолоро" спортивнай оонньуурларга күрэхтэһиэхтээх кырачааннар кытталлар. Кинилэр маастарыстыбаларын үрдэтэр сыалтан улахан дьону кытта тэҥҥэ оонньуохтара. Онон спорт, билим уонна искусство түмүллүбүт көрүҥэр сааһыттан тутулуга суох кыраһыабай киирсиилэри көрүөхпүт. 

Владимир Егоров, СӨ саахымат федерациятын президенэ: «Былырыын 5 гроссмейстер баар этэ, быйыл 6 баар. Ону таһынан биир международнай маастар кэллэ. Эдэр уол, 18 саастаах, аан дойдутааҕыны бу соторутааҕыта кыайбыта. Күүстээх састаап буолла быйыл».

Суруналыыстары кытары пресс-конференсияҕа этиллибитинэн, кыайыылаахтар олохтоох ювелирнай хампаанньа оҥорбут, күндү металл киллэһиктээк мэтээллэринэн наҕараадаланыахтара. Ол курдук, боруонса мэтээл 3 гр. үрүҥ көмүстээх.  Онтон иккис миэстэлээххэ ыраас үрүҥ көмүстэн кутуллубут мэтээл оҥоһуллубут, ыйааһына 99 гр. Онтон көмүс мэтээл 585 пробалаах 6 гр. кыһыл көмүс киллэһиктээх.