Саха сирин норуот маастардарын ииппит тимир ууһа

Леонид Говоров оһоҕун холбоон өссө биир оҥоһугун оҥороору бэлэмнэнэр. Бу сырыыга анньыыны оҥорон саҕалаата. Сатабыллаах маастар мастарскыайын иһэ хаһан да чуҥкуйбат. Өрүүтүн үлэ үөһүгэр сылдьар.

Сибилигин кытарчы буһан тахсыбыт тимири таптайбытанан бараллар. Үөрэнээччитин кытары бу мастарскыайга күннэтэ үлэлиир. Уус киһиэхэ эдэр киһи сыстан инникитин бэйэтэ туспа суоллаах-иистээх, ураты маастарстыбалаах уус буолан тахсар баҕаттан Төҥүлүгэ учууталыгар кэлэн дьиэтигэр олорон эрэ үөрэнэр.

Леонид Прокопьевич сүрүннээн анньыылары оҥорор, хас да анньыы арааһын тобулан таһаарбыт. Дьон сөбүлээн ылар анньыытыгар болҕомтотун уурар.

Анньыыбыт тимирэ таптыллан бүтэн, салгыы чочулана барда. Өр өтөр буолбакка тимири төҥүннэрии түһүмэҕэ саҕаланар. Бу манна баар уус киһи сүрүн кистэлэҥэ, ураты маастарстыбата. Мээнэ киһиэхэ кэпсэммэт, көстүбэт тимири хатарыы хаамыыта

Леонид Говоров анньыыны эрэ оҥорор киһи буолбатах. Быһах арааһын, батыйалары оҥорор. Аан бастаан маһынан ууһанан, муоһу уҥуордан 30-тан тахса сыл тимиринэн дьарыктанар. Намнааҕы педагогическай колледжка 10 сыл устата араас уустарын иитэн таһаарда.

Леонид Говоров, тимир ууһа: «Саха быһаҕын оҥорууга кистэлэҥэ хара баһаам. Ону хас биирдии уус бэйэтэ илдьэ сылдьар. Ол гынан баран сүрүнүн син биир үөрэтэбит. Үөрэппит уолаттарым бастаан мин быһаҕым курдук оҥороллор этэ, кэнники көрдөххө номнуо уларыйан, бэйэлэрэ буочарданан, олох атын улахан маастар буолан үүннүлэр».

Бу мастарскыайы былырыын өр сыллар устата ыра санаа кына илдьэ сылдьыбыт баҕатын толорон туттубута. Манна күннэтэ быһах арааһа, анньыы уонна да атын тимир оҥоһуктар чочуллан тахсаллар.

Леонид Прокопьевич 30-тан тахса сыл устата тимир ууһунан дьарыктаммытын туоһута араас күрэхтэргэ бастаабыта, сүрүн бириистэри ылбыта, тимир уустарын кинигэтигэр киирбитэ туоһулууллар. Өр сыллар тухары эдэр уолаттары уһуйан өрөспүүбүлүкэ 10-нан ахсааннаах норуот маастардарын ииппитэ буолар.