Хаар ыраастааһыныгар уокуруктар күүскэ үлэлэһэллэр
Дьокуускай олохтооҕо Афанасий Тарабукин Губин уокуругар дворнигынан үлэлээбитэ уонча сыл буолла. Маннык күннэтэ сарсыардаттан киэһээҥҥи диэри лааппаакы, сиппиир тутуурдаах сквердэр, пааматынньыктар сирдэрин, уулуссалар кытыыларын, сатыы дьон хаамар сирин, беҕү-саҕы ыраастыыр. Тулалыыр эйгэбит, чуолаан общественнай сир-уот ыраас буоларыгар эппиэтинэстээх муниципальнай дворник биллэн турар бэрт уустук үлэҕэ сылдьар.
Афанасий Тарабукин, Дьокуускай Губинскай уокуругун үлэһитэ: "Биһиги уокурукпутугар уонтан тахса сквер баар ону ыраастыыбыт уонна муосталардаахпыт. 202 уонна 203 түөлбэлэргэ туоруур муосталары хомуйабыт. Маны таһынан кыбаартал бөҕүн хомуйабыт".
Киин куоракка хаары ыраастааһыҥҥа муниципальнай дворниктар уонна "Якутдорстрой" тэрилтэ үлэһиттэрэ сүрүннүүллэр. Араас күҥҥэ-дьылга томороон да тымныыга, өҥүрүк да куйааска түбүгүрэр суол үлэһиттэрэ 2 симиэнэнэн арахсан сууккаҕа 8-12 чаас быыстала суох хаары ыраастыыллар. Хас биирдии уулуссаҕа сатыы сылдьар дьон хаамар сирин, автобус тохтобулларын аттыгар хаары кытта охсуһаллар. Куорат сүүһүнэн уулуссаларын кытыытын, дьиэлэргэ киирии суолу хаартан босхолоон, техникэ тиэйэригэр бэлэмнииллэр.
Онон сылын ахсын биир эрэ тэрилтэ үлэлииринэн, маннык дьаһаныы табыгаһа суоҕунан, ону тэҥэ куорат улаханынан хаары ыраастыырга алтынньы ыйтан эбии илии күүһүн туһанар быһаарыы ылыммыттара көдьүүстээх буолла. Хас биирдии уокурук эбии тэрилтэни кытыннаран, тустаах техникэни наймылаһан хаары уопсай күүһүнэн хомуйар буоллулар. Степан Харитонов уопуттаах үлэһит, номнуо ахсыс сылын Октябрьскай уокурурукка ыраастыыр, хомуйар үлэҕэ сылдьар.
Степан Харитонов, Дьокуускай Октябрьскай уокуругун үлэһитэ: "Былырыыҥҥытааҕар быйыл хаар аҕыйах курдук. Билигин алтыа буолан үлэлии сылдьабыт, онтон биир киһи эбиллиэхтээх. Биһиги үлэбитигэр саамай уустуга халлаан. Тымныыга үлэлиир ыарахан".
Дьокуускай куорат дьаһалтатын уурааҕынан сотору кэминэн олунньу 1 күнүттэн 3 ыйдаах санитарнай ырааһырдыы тэрээһинин биллэрдилэр. Ол чэрчитинэн кыһын устата мунньуллубут хаары, бөҕү-саҕы ыраастааһын, тиэйии-таһыы үлэтин күүһүрдэн бириэхтэрэ.