Чэпчэки атлетикаҕа бастыҥнар ааттаннылар

Старт бэриллэн спортсменнар буут быстарыныы сүүрэллэр. Илин-кэлин түсүһэн бастыыр иһин киирсэллэр. Өрөспүүбүлүкэ чэпчэки атлетикаҕа чөмпүйэнээтэ үрдүк күүрүүлээхтик ыытылынна.

Саамай күүтүүлээх, тыҥааһыннаах сүүрүннэн 3000 миэтирэҕэ буолла. Манна эр дьон, дьахталлар уонна бэтэрээннэр буолан арахсан сүүрдүлэр. Амма улууһуттан төрүттээх Айсенбег Черепанов балтараа тыһыынчаҕа уонна 3 тыһыынчаҕа тэҥнээҕин булбата.

Айсенбег Черепанов, 1500 уонна 3000 миэтэрэҕэ СӨ кыһыҥҥы чөмпүйэнээтин кыайыылааҕа: "Бэйэм муҥутуур көрдөрүүбүн ситтим. Дьиҥэ өссө үчүгэйдик сүүрүөхпн сөп эбит. Утарсааччыларбар махтал, үрдүк таһымнаах састаап кэлбит. Урут сүүрэ сылдьыбыт дьон, кинилэри кыайталаатым. Онон саҥа көлүөнэ кыайыыта диэххэ сөп".

Онтон бэтэрээн спортсменнарга эмиэ ботуччу соҕус элбэх кыттааччы кэлбит. 35 саастарыттан үөһээ диэн ирдэбилинэн 70-наах да дьон ситиһиилээхтик кытыннылар. Уус Алдан олохтооҕо Василий Готовцев дойдутун аатын күүскэ ааттатта. Бэйэтин дистанциятыгар кыайыыны ситистэ. 

Василий Готовцев, 3000 миэтэрэҕэ бэтэрээн спортсменнарга СӨ кыһыҥҥы чөмпүйэнээтин кыайыылааҕа: "Бэйэбин тургутан көрүү курдук кытынным. Улахан дьарыгым суох этэ. Аһылламмын үчүгэйдик сүүрдүм. Манна эдэр да саастаах да дьон биры биир тэҥҥэ киирсэ сылдьаллар".

"Өрөгөй" спорт уораҕайыгар көрөөччү син мустан күрэхтэһиини бэрт сэргэхтик көрдүлэр. Тохсунньу тоһуттар тымныылара бу манна умнулла быһыытыйан дьиҥ чахчы чаҕылхай түгэннэри көрөөччүлэр харахтарыгар хатаатылар, ыһыытаан-хаһыытаан сэргэхсийэн ыллылар.

Сүүрүүнү кытары тэҥҥэ ырааҕы ыстаныы күрэҕэ ыытылынна. Манна эр дьоҥҥо саамай ырааҕы Мэҥэ Хаҥалас спортсмена Игорь Скрябин 15 миэтэрэ 32 сантиметры ыстанан муҥутуур кыайыылаах аатын ылла. Быйылгы күрэх сүрүн уратыта бэтэрээн спортсменнар кыттыылара буолла.

Борис Ильин, ыстаҥа күрэххэ Мэҥэ Хаҥалас улууһун бэрэстэбиитэлэ: "Ыстаҥа күрэһэ этэҥҥэ ааста. Муҥутуур көрдөрүү оҥоһуллубата. Бу көрүҥҥэ бастыҥнар кытыннылар. Саҥа ааттар суохтар. Көрдөрүүлэрбит эмиэ уруккулар".

Чэпчэки атлетикаҕа өрөспүүбүлүкэ чөмпүйэнээтэ спортсменнарга саҥа сылга бастакы улахан күрэхтэһии буолар. Сыл устата Сахабыт сирин араас түһүлгэлэригэр чаҕылхай киирсиилэр, күөн көрсүүлэр буолуохтара.