Саҥа министиэристибэ биир сыллааҕы үлэтин түмүгун таһаарда

Билиҥҥи балысхан олоххо саамай тоҕоостоохтук тэриллибит Гражданскай оборуона уонна нэһилиэнньэ олоҕор-дьаьагар куттал суох буолуутун хааччыйар саҥа министиэристибэ аан бастакы отчуотун ыытта. Миниистир Дмитрий Лепчиков бастатан туран үлэ сылын түмүгун этэн туран, үлэ сылын дьоруойдарын ааттаталаан, дакылаатын саҕалыыр.

Бастатан туран, министиэристибэ бастакы сүрүн соругунан буолар  - ыраах сытар улуустарга таһаҕаһы тиэйии. Ааспыт сыл сэтинньи ый 30 күнүнээҕи Ил Дархан уурааҕынан тустаах министиэристибэ Хоту уонна Арктика эҥээр таһаҕаһы тиэйиини былаанныыр, тэрийэр боломуочуйалааммыта. Күн бүгүн бу үлэ былаана барыта туолан турар.

Никита Павлов, СӨ гражданскай оборонатын уонна нэhилиэнньэ олоҕор-дahaҕap куттал суох буолуутун хааччыйар министиэристибэ миниистирин солбуйааччы: «Ааспыт сылы көрдөхпүтүнэ тиэйиибит барыта этэҥҥэ ааста. Кыһыҥҥы суолларынан 2022-23 сыл былаана 870 тыһ. туонна этэ, онон кыһыҥҥы тиэйииннэн былааммытын толорон олоробут. Навигация былаана 1 мөл. 270 тыһ. туонна. Түмүкпүтүн көрдөххө былааммытын 101% толордубут. Бу сыл кыһыҥҥы тиэйиитин саҕалаатыбыт».

Маныаха ойуур баһаардарын, сааскы халааны утары охсуһууга тустаах министиэристибэ атын биэдэмистибэлэри кытары үгүс үлэ ыыппыта. Быйылгы халаан этэҥҥэ ааспыта, айылҕа баһаардарын утары саҥа ньымалар киирэн үлэ күргүөмнээҕэ барбыта.

Айаал Вензель, СӨ гражданскай оборонатын уонна нэhилиэнньэ олоҕор-дahaҕap куттал суох буолуутун хааччыйар министиэристибэ миниистирин бастакы солбуйааччы: «Тыа баһаарыгар самолет-зондировщик тутуннубут. Итинник Арассыыйа үрдүнэн бастакы көтөр аал буолар. Бу сылга эмиэ туттуохпут. Тоһоҕолоон эттэххэ, бүгүн түмүккэ сылбыт соруктарын салайыллар сулууспаларбытыгар баһаары утарар уонна быһыы сулууспа түмүгүн оҥоруохпут».

Чахчы, бу күн үүммүт 2024 сылга саҥа сыаллар-соруктар турдулар. Онтон сүрүннэрэ бу сайын буолар "Азия оҕолоро" норуоттар икки ардыларынааҕы спортивнай оонньуларга кыттааччыларга да, ыалдьыттарга да куттал суох буолуутун хааччыйыы. Маныаха биир бэлиэ түгэнинэн саҥа министиэристибэ дьон быраабын көмүскүүр боломуочунайын Сардаана Гурьевалыын инникитин ситимнээхтик үлэлииргэ сөбүлэҥ түһэристилэр.

Сардаана Гурьева, СӨ киһи быраабыгар боломуочуйалааҕа: «Биһи оннук үлэни ыытыахпыт диэн сөбүлэҥ докумуону түһэристибит. Уонна, холобура, бырааба хааччахтаммыт буоллаҕына, оччотугар биһи түргэнник бэйэ бэйэбитигэр регламент нөҥүө тутатына сөптөөх дьаһал ылынарга дьулуһуохпут».

Тэрээһин түмүгүнэн ааспыт сылга көдьүүстээхтик үлэлээбит үлэһиттэри наҕарадалаан, саҥа сылга саҥа тыыннанан үлэ салҕанар.