Дьокуускайга 28-с төгүлүн ыытыллар "Инникигэ хардыы" научнай конференция саҕаланна

Собо тыла, оҕонньор ото, сытыган эрбэһинэ - Сахабыт сирин кэрэ үүнээйилэрэ, эмтээх отторо. Сунтаар улууһун Дьаархан орто оскуолатын 7-с кылааһын үөрэнээччитэ Юлиана Федорова медицина хайысхатыгар кэлэн кытта сылдьар. Сүрүн соруга эмтээх оттору нэһилиэнньэҕэ билиһиннэрэн, туттуллар эйгэтин хаҥатыы. Айылҕа маанылаах бэлэҕин туһаҕа таһаарыы.

Юлиана Фёдорова, Сунтаар улууһун Дьаархан орто оскуолатын үөрэнээччитэ, "Инникигэ хардыы" күрэх кыттыылааҕа: «Манна оттор туһунан кэпсиибин. Ханнык отторунан туттарбытын, эмтэнэрбитин туһунан. Бу үөрэ ото, тумууга туттуллар уонна кыраадыһы түһэрэр. Собо тыла бүөр ыарыытыгар туттуллар. Оттон бу оҕонньор ото, сөтөлгө туттуллар. Сиһик ис ыарыытыгар туттуллар».

Онтон Владимир Дяриков Үөһээ Бүлүүгэ аан бастакынан экологическай хамсааһыны саҕалаабыт. Эргэ туттуллан бүппүт маллары иккис тыыннаан, туһаҕа таһааран нэһилиэнньэҕэ хамаҕатык батарбыт. Оскуолатын оҕолорун кытары нэһилиэк бөҕүн хомуйан иккис олоҕу бэлэхтииргэ үлэлэһэр.

Владимир Дяриков, Үөһээ Бүлүү Хоро орто оскуолатын үөрэнээччитэ, "Инникигэ хардыы" күрэх кыттыылааҕа: «Бу маннык оҥоһуктары оҥорбуппут. Уолаттар буолан маһынан сибэкки олордор оҥорбуппут. Уонна онтукабытын атыылаабыппыт. Ол мунньубут харчыбытынан бөҕү переработкаҕа ыыппыппыт Якутскай экологическай компания нөҥүө».

Быйылгы күрэх сүрүн уратыта - кыттааччы ахсаана элбээһинэ буолар. 1572 оҕо бэйэлэрин бырайыактарын көмүскүүллэр. Аан бастакытын тас регионтан кытааччылар кэлбиттэр. Ол курдук, Чукотка уонна Приморскай кыраай үөрэнээччилэрэ бырайыактарын билиһиннэрэллэр. Уонна саҥа сүүрээнинэн ИТ хайысха аһыллыыта буолар.

Александра Яковлева, СӨ Билим дьоҕус академиятын проректора: «Саҥа хайысхалар аһылыннылар. ИТ өттүнэн кэҥэттибит. Өрөспүүбүлүкэ үрдүнэн ИТ-куб, Кванториум, оскуолалар материально-техническэй олохторо кэҥээн бу өттүтүнэн бырайыак ахсаана элбээтэ уонна быйыл сайдыы кэмэ кэллэ диэммит ИТ өттүтүнэн кэҥээтибит».

Саҥа арыллыбыт ИТ хайысхаҕа элбэх кытааччы кэлэн кытта сылдьар. Оҕолор сүрүннээн саҥа сыһыарыылары, бырагыраамнай хааччыйыылары оҥорбуттар. Уус Алдан Лөгөй орто оскуолатын үөрэнээччитэ информатикаҕа биир кэлим экзамены туттарыыга аналлаах бэлэмнэнэр анал сыһыарыы оҥорбут.

Айхал Татаринов, Уус Алдан улууһун Лөгөй орто оскуолатын үөрэнээччитэ, "Инникигэ хардыы" күрэх кыттыылааҕа: «Информатика экзаменыгар бэлэмниир бырагыраама суох. Барыта интернетынан үлэлиир уонна интернет баар буолан үлэлии олорор оҕо эппиэтин барытын көрүөн сөп. Оннук буолбатын гына сыһыарыы оҥорбутум, интернета суох үлэлиир. Эппиэтин барытын бэрэбиэркэлиир».

Күрэхтэһии ыытыллар түһүлгэтэ туолан киһи хаамар да сирэ суох буолар. Манна экспертар кэрийэ сылдьан оҕолору истэллэр сыана туруораллар. Бастыҥнары быһаараллар.

Бастаабыт уонна миэстэлэспит оҕолор аны дойду таһымыгар кытталларыгар анал суруктары тутуохтара. Кинилэргэ анаан Өрөспүүбүлүкэ бастыҥ учуонайдара сүбэ-ама буолуохтара.