"Азия оҕолоро" спортивнай оонньууларга бэлэмнэнии тэтимин ыһыктыбат

Бырабыыталыстыба Бэрэссэдээтэлэ Кирилл Бычков салайааччылаах хамыыһыйа Дохсун спорткомплекстан үлэтин саҕалаата. Манна өрөмүөн үлэтин үгэнэ. Ис сыбаҕы, муостаны саҥардыы бара турар. Уопсайынан бу күҥҥэ манна 12 араас хайысхалаах үлэ ыытыллар. Бастакы этээс толору өрөмүөннэнэр. Хамыыһыйа оҥоһуллубут үлэни бэрэбиэркэлиир кэмигэр ордук хаачыстыбаҕа болҕомтолорун ууралларын ыйда итиэннэ болдьохтон хаалан иһэр бэдэрээччиктэри ыксыылларын модьуйда. Дохсуҥҥа ааспыт сылтан үгүс үлэ барбыт. Ол курдук дьиэ үрдүн, тас бүрүөһүнүн саҥардыбыттар, терроризмы утары ирдэбил бөҕөргүтүллүбүт. Маны сэргэ саамай улахан өрөмүөн футбол хонуутугар барбыт. 

Александр Андреев, “Дохсун” спорткомплекс дириэктэрин эбээһинэһин толорооччу: «Дьиэ иһигэр киирдэххэ футбол хонуутун бүтүннүүтүн өрөмүөннэтибит. Хонуу 100% уларыттыбыт, сүүрэр суолу эмиэ уларыттыбыт, истиэнэтин кырааскалаатыбыт, трибуналары өрөмүөннээтибит. Эһиил “Азия Оҕолоро” оонньууларга скалодром диэн көрүҥҥэ күрэхтэһии буолуохтаах, ол онно миэстэтин бэлэмнээн икки трибунаны көтүрдүбүт уонна ититиитин бэлэмнээтибит».

Салгыы Эллэй Боотур спорткомплексы көрдүлэр. 1996 сыллааҕы тутууга уу-хаар уонна ититии систиэмэтэ өрөмүөннэммит. Маны сэргэ тас өттүгэр саҥардыы үлэтэ ыытыллыбыт, мууһу тоҥорор тэрил уларыйбыт. Манна уопсайа барыта 58 мөл. кэриҥнээх үбүлээһин көрүллүбүт. Кирил Бычков “Азия Оҕолоро” спортивнай оонньуу маҥнайгытын ыытылларыгар тутуллбут эбийиэк ис туруга өссө да уһун сылларга сулууспалыыр кыахтааҕын ыйда. Итиэннэ билигин сүрүн күүһү өрөмүөн иккис түһүмэҕэр аныыры бары спорт эбийиэктэригэр тоһоҕолоон эттэ.

Кирилл Бычков, СӨ Бырабыыталыстыбатын Бэрэссэдээтэлэ: «Сейчас подрядчики будут проводить работы по косметике, то что жители увидят глазами, то что будет бросаться в глаза, оно будет сейчас делаться по всем объектам. Кое-какие сроки мы сегодня подкорректировали».

Спорт эбийиэктэригэр салгыы өрөмүөн үлэтэ тэҥҥэ ыытыллыа суоҕа, олохтоохторго табыгастаах буоларын курдук быысаһан оҥоруохпут диэн хамыыһыйа быһаарда. Салгыы Чолбон бассейн сыл улахан тэрээһинигэр бэлэмин көрдүлэр. 5 оонньууларга ананан тутуллубут эбийиэккэ былырыын эмиэ үгүс үлэ барбыт. Эрчиллэр саала, ититии систиэмэтэ, суунар кабиналара саҥардыллыбыттар итиэннэ дьиэ тас өттүгэр өрөмүөн барбыт. Онон манна эрчиллиилэр номнуо тиһигин быспакка бара тураллар. Спорт сүрүн эбийиэктэрин көрүү хаамыытыгар хантараак барыта баттаммытын ыйдылар.

Леонид Спиридонов, С: спорт уонна физическэй култуура миниистирэ: «Хантараактааччылар барбыттара уонна билигин салҕыы бу кэлэр тохсунньу уонна олунньу ыйдарга өрөмүөннэри оҥоруохтаахпыт диэн быһаарыстыбыт. Оттон Кирил Евгеньевич этэринэн үчүгэйдик “Азия оҕолоро” чугаһаатаҕына тас үлэни, дьон хараҕынан көрөр өттүллэрин үчүгэйдик оҥорон биэриҥ диэн сорудах биэрдэ».

Ол курдук өрөмүөн үлэтэ 14 спорт эбийиэгэр бара турар. хамыыһыйа бу саалалары аны биир ыйынан хаттаан көрүөҕэ. Онуоха диэри ыйыллыбыт сорудахтары толоруохтара.