Аан дойдутааҕы талаан бэстибээлигэр Чурапчы улууһун үҥкүү уонна хомус ансаамбыла бэлэмнэнэр

Эппиэтинэстээх улахан күрэх иннинэ биллиилээх хомусчут Артур Семёнов кэлэн оҕолор дьарыктарын чочуйар. Кини "Айгыл" ансаамбыл бастакы иитиллээччитэ. Айгыл ансаамбыл хомусчуттарыгар кэмиттэн кэмигэр кэлэн, маастар кылаастары ыытар. Бэйэтин уопутуттан оҕолорго уонна төрөппүттэргэ тас дойду күрэхтэригэр ордук тугу биһирииллэрин, хайдах сылдьыахтаахтарын туһунан кэпсээтэ. Көччөх гынан көтүппүт ансаамбылын туһунан кэпсиир.

Артур Семёнов, "Айгыл" фольклорнай ансаамбыл иитиллээччитэ, хомусчут: «Бу бөлөх биһигиттэн саҕаламмыта. Баара суоҕа 5 этибит. Чурапчы үрдүнэн хомус ансаамбыла соҕотох этибит. Уопсайынан хомуһу Марианна Михайловна билиһиннэрбитэ. Кини үөрэтэн, такайан. Билигин бэйэм хомусчуттуубун уонна салгыы хомусчуттары уһуйабын».

“Айгыл” ансаамбыл 19 сыл тухары хас эмэ сүүһүнэн хомусчуттары иитэн таһаарда. Еремеевтэр дьиэ кэргэҥҥэ үс оҕолоруттан иккитэ бу ансаамбылга дьарыктанар. Үөрэхтэн ураты сүрүн биир умсугуйан туран дьарыктанар куруһуоктарынан хомус ансаамбыла буолар. Оҕоҕо кыра сааһыттан төрүт култуураны иҥэрии хас биирдии саха ыалын эбээһинэһэ диир.

Матрёна Еремеева, төрөппүт: «Ортоку уолум эмиэ дьарыктаммыта бу ансаамбылга. Манна дьарыктананнар оҕолорум сири-дойдуну кэрийдилэр. Онон Марианна Михайловнаҕа махталбыт улахан. Уолаттарым Артек лааҕырга ансаамбылынан баран сынньанан кэлбиттэрэ. Оҕо төрөөбүт култууратыгар чугаһыыр уонна сири-дойдуну кэрийэн уопсай сайдар».

Айгыл ансаамбылга билигин Чурапчы улууһун араас муннуктарыттан киирэн дьарыктаналлар. Хомуһунан дьарыктаныан баҕалаах оҕо сылтан сыл көрдөрүүтүн түһэрбэт. Сири-дойдуну кэрийэн, атын омук култууратын кытта алтыһар баҕаттан ансаамбылга бэһис кылаастан киирэллэр. Хомуска бастакытын оонньуур оҕону аҕыйах күн иһигэр үөрүйэҕин чочуйаллар.

Кристина Дьячковская, "Айгыл" фольклорнай ансаамбыл иитиллээччитэ: «Бу ансаамбылга киирбитим 5-6 сыл ааста. Киирбиипиттэн баччааҥҥа дылы элбэх баҕайы куонкурустарга кытынныбыт, элбэх сирдэри кэрийдибит, элбэххэ үөрэнним, учууталбыт наһаа үчүгэй».

Ансаамбыл бас-көс киһитэ, салайааччы, Марианна Слепцова оҕолорун сыл аайы Аан дойду таһымнаах улахан куонкурустарга кытыннарар. 50 оҕоҕо биир ансаамбыл иһигэр или-эйэни олохтоон, иккис ийэлэринэн буолар. Кытайга буолар бэстибээлгэ "Айылҕа уһуктуута" нүөмэрдэрин бэлэмнээтилэр.

Үгүс ситиһиилээх ансаамбыл салайааччыта аҥаардас ансаамбылын эрэ оҕолорун дьарыктаабакка, "Хомусный код" бырайыак чэрчитинэн Өрөспүүбүлкэ араас муннуктарын кэрийэн, нэһилиэнньэни саха төрүт үнүстүрүмүөнүгэр оонньуурга үөрэтэр.

Марианна Слепцова, "Айгыл" фольклорнай ансаамбыл салайааччыта: «Оҕо бэйэтэ ис туругунан уонна саха буоларын быһыытынан олуһун диэн киэҥ туттан, бэйэтин омугунан олус диэн астынан, уопсайынан оҕо сири-дойдуну көрдөҕүнэ, кини туох баар билиитэ-көрүүтэ, бэйэтин ис туруга уонна дьону кытта сыһыана олуһун уларыйар дии санаатым».

“Зимний Харбин” бэстибээлгэ куруһуок улахан бөлөҕө кыттыыны ылар. Саха өрөспүүбүлүкэтиттэн Ольга Андреева салайааччылаах “Норд Стар” диэн кэмитиэт тэриллэн барда. Кытайтан үрдүк кыайыы көтөллөнөн кэлиэхпит диэн улахан эрэли уураллар.