Горнай улууһугар үөрэх кэннэ дьарыктыыр бөлөх ааспыт сыл устата тиһигин быспакка үлэлээтэ
Таһырдьа -50 тымныы, будулҕан туман быыһынан Моруос оҕонньор Хаарчаанатын кытары кэлэн иһэллэрин оҕолор киэҥ түннүктэр нөҥүө бэлиэтии көрөннөр үөрүүлэрэ үксүүр, минньигэс бэлэхтээх кырдьаҕаһы кытары куобахчаан уонна эһэчээн оонньууну оройуттан тутаары оҕолорго бу күн ыалдьыттыы кэлбиттэр. Бу Бэрдьигэстээхтэн анал байыаннай дьайыыга кыттыыны ыла сылдьар эр дьоннор оҕолоро муһуннулар. Дьиэлэригэр соҕотох хаалбыт ийэлэргэ көмө буолар сыаллаах "Ийэҕэ көмө, оҕоҕо үөрүү" диэн бырайыагынан алын уонна орто сүһүөх оскуола үөрэнээччилэригэр анаммыт үөрэх кэннэ дьарык бөлөҕө 2023 сыл саҥатыгар үлэтин саҕалаабыта. Бу бырайыак 2022 сыл бүтүүтэ дойду Президенин гранын кыайыылааҕа буолан 961 тыһ. солк. үпкэ тиксибитэ. Үлэни нэһилиэк уопсастыбаннай түмсүүлэрин сүрүннүүр “Сарыал” коммерческайа суох тэрилтэ аатыттан, ыччат агентствотын исписэлиистэрэ уонна нэһилиэк баһылыгын солбуйааччыта Ксения Васильева суруйбуттара.
Ксения Васильева Бэрдьигэстээх нэһилиэгин баһылыгын солбуйааччы: «Бу Эйэ скверын павильонугар ыччат агенствотын дьиэтин уларсан, бэйэтэ туох баар хомуналынайын төлөөн игин. Бу үөрэхтэрин таһынан биһиги партнер быһыытынан муниципальнай учрежденияларбыт – сынньалаҥ киинэ, мусуой, оҕо бибилиотеката сотору-сотору кэлэннэр араас тэрээһиннэргэ кыттыстылар, бэйэлэрэ тэрийдилэр, маастар-кылаастары ыыттылар».
Үөрэх кэннэ дьарык сэлиэнньэ килбэйэр киинигэр Эйэ павильонугар арыллан үлэлээтэ. Оҕолор манна кэлэннэр дьиэҕэ үлэлэрин аахтылар, бириэмэлэрин туһалаахтык атаардылар. Дьарыктары оҕо үөрэхтээһинигэр олохторун анаабыт бэтэрээн педагогтар Ирина Дмитриевна Исакова, Оксана Егоровна Абрамова уонна Лилия Алексеевна Корякина ыыттылар.
Лилия Корякина, "Ийэҕэ көмө - оҕоҕо үөрүү" эбии дьарык учуутала: «14:00 чаастан 17:00 дылы мин кинилэри аралдьытабын. Дьиэтээҕи үлэни аахтарабын. Төрөппүттэн уонна учууталлар көрдөстөхтөрүнэ мин кинилэри эбии аахтарабын. Бастакы кылаастары ааҕарга, суруйарга, уруучуканы сөпкө тутарга үөрэттим. Учууталлар, төрөппүттэр махталлара улахан. Онтон наһаа үөрэбин».
Бырайыак сыл устата халбаҥнаабакка 20 оҕону хабан үлэлээтэ, тэрээһиҥҥэ кэлбит оҕолор билэр ырыаларын тойуктарын ыллааннар, хоһооннорун этэннэр тымныы кырдьаҕастан хардатын бэлэхтэри кыбыннылар ону таһынан ыччат агентствота, оҕо библиотеката, кыраайы үөрэтэр түмэл ыыппыт араас көрүҥ оонньууларыгар кыттаннар эбии бириистэри туттулар
Альвина Кононова, "Ийэҕэ көмө - оҕоҕо үөрүү" эбии дьарык үөрэнээччитэ: «Саха тылыгар уонна математикаҕа 4 сыанаҕа дьарыкка сылдьан бардым. Манна наһаа үчүгэй уонна эһиил элбэхтик кэлэр буолуом. Хаһан да сабыллыбатын диэн эрэнэбин».
Кэргэттэрин анал байыаннай дьайыыга атааран бэйэлэрэ эрэ хаалбыт үлэлиир эдэр ийэлэр чэйтэн киэһэ оскуола кэннэ кыра саастаах оҕолорун ханна да, хаалларар сирдэрэ суох балаһыанньалара үөскээбитэ, ону тэҥэ сыралаах үлэ кэннэ киэһэтин түбүктээх тыа сирин олоҕор дьиэни көрүү-истии, иһирдьэ-таһырдьа үлэ барыта дьахтар санныгар сүктэриллибитэ. Маныаха оскуола садаанньаларын, сорудахтарын толору аахпыт, бэлэмнээбит кыра саастаах оҕолор киэһэтин ийэлэрин сынньаталларын таһынан көмө да буолаллар.
Ньургуйаана Заровняева, төрөппүт: «Маннык эбии дьарык баара наһаа үчүгэй. Оҕом уруогун барытын толорор. Киэһэ үлэбиттэн сылайан кэлэн кинини уруок аахтарбаппын, боруоста ааҕыыбытын эрэ бэрэбиэркэлиибит. Манна кэлэрин оҕом сөбүлүүр. Өссө хомуска үөрэппиттэрэ, үҥкүүгэ дьарыктыыллар. Оҕом сайдарыгар үчүгэй баҕайы».
Гран харчытыгар оҕолорго усулуобуйаны барытын тэрийбиттэр, телевизорыттан саҕалаан, доскатыгар, олорор олоппоһугар, остуолугар тиийэ ылбыттар, саҥа сылга продленка үлэлиирин кыһалҕалаах төрөппүттэр бары да күүтэллэр, учууталлар ааспыт сылга гран харчытыттан хамнастаммыт буоллахтарына, саҥа сылга үөрэтээччилэри хантан хамнастыыр боппуруос билиҥҥитэ быһаарыллыбакка турар. Онон көдьүүстээх социальнай бырайыак бугуҥҥу куҥҥэ тохтуур кутталанна. маныаха хайа эмэ кыахтаах тэрилтэ күүс буоларыгар төрөппүттэр оҕолор уонна тэрийээччилэр эрэнэ хаалаллаллар.