Чэгиэн ас туһатын оскуолаҕа үөрэтии

6 "А" кылаастарга органика уруога. Бу быйылгаттан саҥа киирбит куурус. Кырачааннар ылбыт билиилэрин иҥэринээри киһи доруобуйатыгар туһалаах, ордук иҥэмтиэлээх астары буукубаларынан наардаан азбука оҥороллор. Хас биирдии оҕо чэгиэн аска тугу киллэрэрин уруһуйга түһэрэр. Кинилэр бу иннинэ 16 чаастаах уруогу ааспыттар.

Виктор Осипов, Хатас орто оскуолатын үөрэнээччитэ: "Светлана Никадровна биһиэхэ аһылык туһатын уонна буортутун туһунан кэпсиир этэ".

Оҕону кыра эрдэҕиттэн чэгиэн аһылыкка үөрэтэр сыаллаах дьарык анал бырагыраама быһыытынан уһуйуллар. Дойду үрдүнэн 31 эрэ оскуолаҕа күннээҕи сиир аһылыкпыт  туһатын, буортутун үөрэтэллэр. Онтон Саха сиригэр  түөрт агро хайысхалаах оскуолаларга бу үөрэх дьылыттан баар буолла. Ол курдук Хатас, Тулагы, Майа уонна Чурапчы Дириҥигэр.

Светлана Попова, Хатас орто оскуолатын учуутала: "Оҕолор бэйэлэрэ сиир астарын, холобура, чипсыларын, иһэр соктарын ырытабыт, буортулаах астары үөрэтэ сатыыбыт. Ону тэҥэ төрүт астары эмиэ үгүстүк кэпсиибит".

Кыра кылаастар санааларын уруһуйга түһэрэр эбит буоллахтарына улахаттар өйтөн суруйууга тиһэллэр. Манна үөрэнээччилэр теорияҕа билиилэригэр эрэ тирэҕирбэттэр. Кинилэр бэйэлэрин хас да сыллаах уопуттарыгар, оскуола чэгиэн ас туһатын дакаастааһыннарыгар, онтон билигин оҥорон таһаарыыларыгар олоҕуран эсселарын суруйаллар.

Хатас орто оскуолата өрөспүүбүлүкэҕэ биир бастыҥ көрдөрүүлээх. Манна үөрэҕи, науканы уонна оҥорон таһаарыыны тэҥҥэ дьүөрэлээн үлэ барар. Ол курдук манна сылы эргиччи күөх үүнээйи ситэр, гидропоника диэн ньыманан тиһигин быспакка сиэмэни клоннааһын уопута ыытыллар. Итини сэргэ оҕолор арыйыылара олохтоох оҥорон таһаарыы кэккэтин хаҥатар. холобура, түөрт сыллаах уопут кэннэ хайа баҕар оҕуруот аһыгар барсар оттон-мастан органическай уоҕурдууну айан таһаардылар. Онтон төрүт аһы оҥорон таһаарыы ураты ньымалара үгүс сыанабылы ыллылар.

Диана Васильева, Хатас орто скуолатын дириэктэри агротехнологияҕа уонна инновацияҕа солбуйааччыта: "Дойдубут аһын туох баар үчүгэй састаабын тириэрдэр ньыманан үлэлии сатыыбыт. Ол иһин биһиги оҥорон таһаарыыбыт барыта олохтоох астан".

Оҥоһуллубут бородууксуйаны батарыы бэйэтэ эмиэ туспа сатыбылы эрэйэр. Онон Хатас оскуолатыгар 5 кылаастан саҕалаан агробизнес кылааһыгар үөрэнэр кыах баар. Маныаха анаан "Успех каждого ребенка" диэн федеральнай бырайыак иитинэн "Агрокуб" научнай - үөрэтэр лаборатория үлэлиир. Онтон оскуола сыһыарыы тутуута олоххо киирдэҕинэ, биир симиэнэҕэ көстөхтөрүнэ үөрэх да, лаборатория да үлэтэ чиҥиир, кэҥиир былааннаах.