Чааска туонна кээмэйдээх сууйар-сотор бордууксуйа оҥоһуллуо
Тустаах тэрил нөҥүө күннэтэ олоххо-дьаһахха туттуллар сууйар-сотор бородууксуйа оҥоһуллар. Саха сиригэр соҕотох бытовой химия уонча көрүҥүн бэлэмниир тэрилтэ үлэтин үгэнэ. Сыах түөр үлэһиттээх. Таатта улууһуттан төрүттээх Евгений Яковлев манна киирэн үлэлээбитэ үһүс ыйыгар барда. Күн ахсын иһиттэргэ кутуу, хаппахтааһын, дьааһыктарга наардааһын түбүгэ.
Евгений Яковлев, тэрилтэ үлэһитэ: "Кыра иһиттээхтэри наардааһыҥҥа, кутууга ордук үлэлиибин".
Бастаан хампаанньа улахан иһиттэргэ бородууксуйаларын бэлэмнээн бөдөҥ тэрилтэлэри кытта үлэтин саҕалаабыта. Онтон быйылгыттан нэһилиэнньэҕэ табгастаах гына кыра иһиттэргэ бородууксуйаларын кутан атыылыыр буолла. Сырьеларын Россия регионарыттан сакаастаан ылаллар.
Вячеслав Афанасьев, тэрилтэ салайааччыта: "Бу сайыҥҥаттан оскуолаларга, уһуйааннарга киирэргэ соруммуппут. Онно кыра иһиттээхтэр наада буолбуттара. Ол иһин кыра таараларга кутан саҕалаабыппыт. Маны сэргэ маҕаһыыннарга эмиэ тахсыбыппыт. Дьокуускайга 50-ча сиргэ атыыланар. Улуустарга эмиэ таҕыстыбыт".
Дойду президенин сорудаҕынан дойду хас биирдии регионугар олохтоох бренд сайдыытын өйөөһүн киириэхтээх. Саха сиригэр олохтоох оҥорон таһаарыыны, бренды өйүүр бырагыраама кэлэр сылтан киириэҕэ. Маныаха өрөспүүбүлүкэбитигэр орто уонна дьоҕус эргиэҥҥэ үлэлиир-хамсыыр дьон ахсаана эбиллэр. Ол курдук кэнники биэс сыл иһигэр сүүрбэ тыһыынча киһи саҥа бизнеска үлэнэн хааччыллыбыт.
Афанасий Саввин, СӨ сайдыытын корпорациятын генеральнай дириэктэрэ: "Быһа кэпсэтии кэмигэр РФ президенэ регион аайы бренды сайыннарыыны, ол иһигэр ону өйүүр бырагыраама баар буолуохтааҕын туһунан эттэ. Саха сиригэр улахан ырыынакка тахса сатыыр бренды билиҥҥититэ бэйэбит эрэ испитигэр сайыннарабыт. 2024 сылга биһиги 30-тан итэҕэһэ суох тэрилтэни хабан, үлэни өйүүр бырагырааманы оҥорон таһаарыахпыт".
Ол курдук сыахха мыыла, иһит-хомуос, таҥас-сап, муоста, түннүк сууйар убаҕастары бэлэмнииллэр. Күннэтэ бүтүн биир туонна бородууксуйаны оҥорон таһаараллар.
Тимур Дмитриев, сыах салайааччыта: “Үлэбит элбээн иһэр. Күҥҥэ ортотунан туонналыы таһаарабыт. Барыта сэттэ араас көрүҥү оҥоробут”.
Үүнэр сылтан хампаанньа "Кангаласс” урутаан сайдар территорияҕа көһүөхтээх, оччотугар бородууксуйаларын хас да бүк элбэтэр соруктаахтар.
Ариан Оконешников, тэрилтэ атыыга-эргиэҥҥэ салаатын салайааччы: "Саҥа сиргэ көстөхпүтүнэ оҥорон таһаарар кыахпыт кэҥиэҕэ. Ортотунан чааска биир туонна бородууксуйаны оҥорор буолуохпут".
Онон олохтоох оҥорон таһаарар тэрилтэ сайдан, бигэ туруктанан дьону үлэнэн хааччыйара сүрүн сыал-сорук.