Оҕоҕо аналлаах айымньы күрэҕин кыайыылаахтара ааттаннылар
Саха литературатын историятыгар хаалар бэлиэ түгэн. Аан бастакытын оҕо айымньытын суруйуутугар аһаҕас күрэх түмүктэрин иһитиннэрии. Оҕо литературатыгар бастыҥ айымньылаах Валерия Потапова ботуччу сууммалаах премияны тутар. "Бастакы сээ" кэпсээнэ бастыҥынан ааттанар.
Валерия Потапова, күрэх кыайыылааҕа: «Кыайыам дии санаабатаҕым. Суруйан баран ыытан кээспитим. Ол иһин кыайыыбыттан олус соһуйдум. Дьиэ кэргэни быыһааһын туһунан фэнтези суруйбутум».
2-3 миэстэлээх дьон кинигэлэрин таһааттаралларыгар тустаах сертификат туттулар. Маны сэргэ, Саха сирин суруйааччыларын ассоциациялырын, кинигэ кыһатын кытары 3 өрүттээх сөбүлэҥ түһэристилэр. Онон, аны сотору кэминэн саха литературатыгар суох орто саастаах оҕолорго анаммыт айымньылар ааҕааччы киэҥ араҥатыгар тахсыахтара. Тэрийээччилэр үөрүүлэрэ - туруоруммут сыал-сорук туолуута.
Зинаида Архипова, Саха сирин суруйааччыларын сойууһун чилиэнэ, күрэх сүрүн тэрийээччитэ: «Кэнники кэмҥэ оҕоҕо аналлаах литература айыллыбат буолла диэн сүрдээҕин санааҕа ылларар этибит. Бу аҕыс ый иһигэр күрэхпитин тэрийэн, кыайыылааҕы быһааран, бүгүн дьоро күҥҥэ кэлэн турабыт».
Күрэххэ уопсайа 18 үлэ өрөспүүбүлүкэ араас улууһуттан киирбит. Олортон 16-та дьүүллүүр сүбэ сыанабылыгар барбыт. Бастыҥы быһаарыы Сахабыт сирин норуодунай суруйааччыларыгар, ааҕааччы тапталын ылбыт кэпсээнньиттэргэ сүктэриллибит. Дириҥ хорутуулаах үлэ, сыанабыл түмүгэр бастыҥнар ааттара ааттаммыт.
Елена Слепцова — Куорсуннаах, Саха норуодунай суруйааччыта, дьүүллүүр сүбэ бэрэссэдээтэлэ: «оҕо литературатын быһыытынан иитэр – үөрэтэр идеялаахтар, тиэмэлээхтэр диэххэ наада. Аны туран билиҥҥи оҕоҕа аналлаах литератураны көрдүү сатаатаатыбыт, маны сэргэ ситэтэ суох айымньылар киирбиттэрэ. Онон кинигэ тахсыар диэри ааптардар эрэдээктэрдэри, худуоөунньуктары кытта тэҥҥэ үлэлэһиэхтээхтэр».
Аны мантан ыла оҕо литературатыгар судаарыстыба, урбаанньыттар өттүлэриттэн өйөбүл өссө да көрүллүө дуо? Бу маннык чаҕылхай, күүстээх-уохтаах харахтардаах саҥа саҕалааччы суруйааччыларга күүс-көмө, өйөбүл наадата хаһааҥҥытааҕар тоҕоостооҕун көрдөрдө.