Надежда Шепелева аатын муусука оскуолатыгар иҥэрэри туруорсаллар

1-кы Малдьаҕар нэһилиэгэр оҕо ускуустубатын оскуолата. 90 сыллардаах тутуу. Хас эмэ сыллар тухары тутуу үлэтэ ситэ ыытыллыбакка турбут дьиэтин 2003 сыллаахха саҥардаллар. "Үтүө дьыала" бырагырааманан оҕо ускуустубатын дьиэтинэн оҥороллор. Онтон ыла хамсааһын суох. Билигин бу оскуолаҕа уопсайа 295 оҕо 10-тан тахса ускуустуба хайысхатыгар үөрэнэр.

Нэһилиэк баһылыга Айталина Васильева дьыаланы бэйэтин илиитигэр ылан, оскуолатын саҥардар баҕа санаалаах. Уонна Саха сиригэр муусука оскуолалара арыллан, атахтарыгар туралларыгар улахан өҥөлөөх Надежда Шепелева аатын иҥэрэрэгэ былааннаах үлэни ыытар.

Айталина Васильева, 1-кы Малдьаҕар нэһилиэгин баһылыга: «Надежда Шепелева  саҕана тутуллубут оскуолаҕа олоробут. Кини аатын иҥэрээри мустан олоробут. Маны сэргэ, сүрүн көтөҕөр боппуруоспут оҕо муусука оскуолаларын саҥардыы  ханнык да бырагыраамаҕа хапсыбат. “Култуура” национальнай бырайыакка бу эмиэ көрүллүбэтэх».

1-кы Малдьаҕар нэһилиэгэр ааспыт үйэ бастакы аҥаарыгар үөрэхтээһини, ускуустубаны уонна медицинэни биир бастакынан сайыннаран саҕалаабыт Семен Шепелев буолар. Кини 10 оҕолоро дойдуну биир гына тэнийэн билим, култуура араас хайысхаларыгар үлэлээтилэр. Иккис кыыһа Надежда Шепелева саха норуодунай суруйааччыта, Суорун Омолллоон тапталлаах кэргэнэ. Онон өрөспүүбүлүкэҕэ бу дьиэ кэргэн сыдьаана күн бүгүҥҥэ диэри таһаарыылаахтык үлэлии сылдьар.

Люция Васильева, Суорун Омоллоон уонна Надежда Щепелёва кыыстара: «Булгунньахтаах дьоно-сэргэтэ, ыччата сүрдээх улахан кылааттаах уонна улахан ситиһиилээхтэр эбит. Ол иһин мин муусука оскуолата Наталья Семеновна аатынан ааттаныа диэммин баҕарабын».

Саха оператын киэҥ эйгэҕэ аан бастакынан таһаарбыт Надежда Шепелева чугас аймах дьоно төгүрүк остуолга муһуннулар. Булгунньахтаах сирин олохтоохторо талааннара тугунан да муҥурдаммат, таһыччы эбит диэн сөхтүлэр.

Муусука бары үнүстүрүмүөннэрин баһылаан, Надежда Семеновна арыйбыт киэҥ ыырын салгыыллар. Сахалыы опера улахан сыанаҕа хаһааҥҥыттан тахсыбытын Гаврил местников кэпсээтэ.

Гаврил Местников, 1991-2013 сылларга Д.К.Сивцев - Суорун Омоллоон аатынан опера уонна балет тыйаатырын дириэктэрэ: «1957 с. Москва куоракка Саха сирин култууратын, ускуустубатын декадата аан маҥнайгытын ыытыллыбыта. Онно биһиги аатырбыт “Ньургун Боотурбутун” туруорбуттара. Онно Наталья Семеновна Айыы  Умсуур удаҕан оруолун толорон биһирэбили ылбыта».

Төгүрүк остуол тула кэпсэтии кэннэ, өрөспүүбүлүкэ Ил Дарханыгар, Айсен Николаевка, саҥа оҕо ускуустубатын оскуолатын туттарыы туһунан  туһаайыы устан ыыттылар.

Бу курдук  дириҥ устуоруйалаах Булгунньахтаах сирин мусукааннара саҥа оскуолаҕа үөрэнэр баҕалара баһаамын көрдөрдөрдүлэр. Кыһалҕалаах боппуруостара быһаарылыннар эрэ, сайдар кэскиллэрэ улахан.