Өрөспүүбүлүкэ маастардарын бастыҥ күрэҕэр бэлэмнэнии күүстээхтик барар

Куукуланы оҥоруу креативнай индустрия хайысхатыгар сайдан турар. Ол курдук 2-с куурус устудьуона Валерия Жиркова 2 сыл иһигэр элбэх уопуту ылынан, хаһыс да оҥоруута буолар. Маастар киһи туттунуута нарын-намчы, сымнаҕас буолара ирдэнэр. Биир эмит алҕас туттунуу хас эмэ күннээх үлэни буортулуон сөп. Валерия оҥорбут куукулалара Августина Филиппова күрэҕэр, быыстапкаларга дьон үрдүк биһирэбилин ылан тураллар. Куукуланы оҥоруу сүрүн ыарахана туохха сытарын устудьуон үллэстэр.

Валерия Жиркова, "Айар уустар" креативнай индустрия колледжын 2-с кууруһун устудьуона: «Бастаан төбөтүн, дьүһүнүн оҥорооһуҥҥа кабинет итии буоллаҕына өр баҕайы оҥоһуллааччы».

Куукуланы аралдьыйбакка оҥордоххо киһи 2 нэдиэлэ иһигэр бүтэриэн сөп. Оттон үөрэх бырагырааматын иһигэр сыл аҥаарынан бүтэрэллэр. Киһи тарбаҕын төбөтүнэн аргыый даҕайан, туойтан оҥоһуллубут куукула төбөтүн сэрэнэн тутар. Уонна сахалыы быһыылаах-таһаалаах куукулаҕа саха ис киирбэх сэбэрэтин оҥорон таһаарар. Ол кэннэ баттах иилэр эмиэ судургу үлэ буолбатах. Килиэйи кытта сэрэхтээхтик туттар наадалаах, баттаҕар иилистэн хааллаҕына, барытын саҥаттан иилэр. Ол иһин Айар уустар устьудьуоннара бэйэлэрэ талан ылбыт иистэнии идэтигэр ордук болҕомтолоох сыһыаннаахтар.

Айталина Маркова, "Айар уустар" креативнай индустрия колледжын учуутала: «Былырыын “Якутия мастеровая” кыргыттар үлэлэринэн кыттыбыттара. Кэҕэ диэн куукуланнан дипломант буолбуттара уонна махтал сурук ылбыттара».

Үөрэх аан бастаан арылларыгар таҥаһы дизайнныыр хайысха арыллыбыта. Онтон кэлин кэҥээн дьиэ ис-тас бараанын оҥорор идэ эбиллибитэ. Билигин таҥаһы ураты көрүүлээн оҥорон таһаарар үөрэххэ инникигэ хардыы билим күрэҕэр бэлэмнэнэллэр. Оттон колледж биир сүрүн хайысхатынан муосчут үөрэҕэ буолар.

Манна устудьуоннар тайах, таба, чубуку, сэлии муоһуттан оҥоһуктары оҥороллор. Дизайннарын, эскиистэрин барытын бэйэлэрэ толкуйдаан, айан таһаараллар.

Сергей Хартасов, "Айар уустар" креативнай индустрия колледжын 4-с кууруһун устудьуона: «Билигин харысхал оҥоро сылдьабыт, тайах муоһуттан. Манна харысхал ойуутун уруһуйдуубут уонна оҥорон киирэн барабыт. Бормашинаннан туттары, уруһуйдууру сатыахха наада уонна бүттэ».

Оҕолор идэлэрин толору баһылаан тахсалларыгар учуутал болҕомтолоох көрүүтэ-истиитэ куруук наада. Лазарь Кынтаяров уһунар тиэхиникэлэрин чочуйан, тупсаран биэрэр.

Лазарь Кынтаяров, "Айар уустар" креативнай индустрия колледжын учуутала: «Эрдэ WorldSkills буолар этэ, онно кыттар этибит. Билигин Креативнай индустрия чемпионата диэн ааттанна онтукабыт, онно күрэхтэһэбит. Бэйэбит региональнай чемпионат ыытабыт уонна этэҥҥэ биһи колледжпыт оҕолоро үксүн кыайаллар».

Айар куттаах оҕолор 9-с кылаас кэннэ бу үөрэх кыһатыгар туттарсан киирэллэр. Устудьуоннар ураты кэрэ эйгэ идэтин ылан тахсаллар. Оттон хайысхалара сылтан сыл кэҥээн, элбээн иһэллэр, 2022 сылтан ханнык үөрэхтэр эбиилибиттэрин Ирина Каратаева кэпсээтэ.

Ирина Каратаева, "Айар уустар" креативнай индустрия колледжын учуутала: «Саҥа хайысхалар киирдилэр: анимация, фотографирование, реклама, музыкальное и звуковое мастерство, ону таһынан информационные системы и программирование».

Колледж дириэктэрин хоһугар араас сылларга үөрэх кыһатын бүтэрбит үөрэнээччилэр бастыҥ оҥоһуктара өйдөбүнньүк буолан тураллар. Саха уустарын остуоруйатын суруйар үөрэх кэлэр сылга элбэх былааны туруорда.