Киин куоракка Саҥа дьылга бэлэмнэнии

Саҥа дьыллааҕы харыйа араас көрүҥэ атыыга баар. Саамай кыра кээмэйдээҕэ 30 см., оттон үрдүгэ 5 м. тиийэ. Араас өҥүнэн күлүмнээбит 180-наах харыйа орто сыаната 7-8 тыһ. Оттон уота-күөһэ суох, билигин элбэхтэ атыыга барар харыйа сыаната 19 тыһ.  Өрөспүүбүлүкэ бары муннуктарыттан киин куоракка саҥа дьыллааҕы бэлэх, уот-күөс, таҥас-сап ыла киирэллэр. Маҕаһыын иһигэр киирдэххэ эдэрдиин-эмэнниин бары кыра оҕолуун үөрэн, сүргэлэрэ көтөҕүллэн сылдьар. Күлүмнэспит уоттар кэтэһиилээх бырааһынньыгы түргэтитэрдии тырымнаһан тураллар. Өрөспүүбүлүкэ ыраах хоту Булуҥ улууһун, Хара Уулаах нэһилиэгин олохтооҕо бэйэтин кулуубун киэргэтээри маҕаһыыннары кэрийэ сылдьар.

Ольга Сивцева, Булуҥ улууһун олохтооҕо: «Бастатан туран уулуссаларбыт киэргэммиттэрэ санаабытын көтөҕөр. Маҕаһыыннарбыт эмиэ саҥа дьыллааҕы уотунан-күөһүнэн дьиримнээбиттэрэ биллэн туран үөрдэр бөҕө буоллаҕа дии. Саҥа дьыл саҕана биирдэ харыйа туруорааччыбын. Бэйэм култуура үлэһитэбин, ол иһин ордук кулууп киэргэтиитигэр сүүрэбин-көтөбүн. Онон бэйэм дьиэм харыйатын хойутуу туруорааччыбын».

Дьон билигин Саҥа дьылга дьиэтин киэргэтиигэ ураты болҕомтону уурар. Тоҕо диэтэххэ хас биирдии сыл бэлиэтэ бэйэтэ туспа дьүһүннээх, сиэрдээх-туомнаах. Кэлэр сыл мээнэ дракон сылынан буолбакка илиҥҥи халандаары тутустахха, от күөх мас дракон сыла буолар. Кытай омук астрологията биһиги үйэбит иннинэ 2600 сыллаахха төрүттэммитэ. Онтон ыла тэтимин ыһыктыбакка дьон-сэргэ билигин Аан дойду барыта итэҕэйэр күүстээх халандаарын кэрдииһинэн олоробут. Дьокуускай куорат олохтооҕуттан Саҥа дьылга бэлэмнэнии хайдах быһыылаахтык баран иһэрин ыйыттыбыт.

Ирина Кондратьева, Дьокуускай куорат олохтооҕо: «Саҥа дьыл кэлэн иһэрэ биллэр. Онно манна барытыгар харыйа турбут. Биһиги былааммытынан 18 чыыһылаҕа туруорабыт. Ол кун туруордахха дьиэ кэргэҥҥэ кэлэр сылга туох баар барыта үчүгэй буолар диэбиттэр этэ. Ол иһин 18 чыыһылаҕа хомунан эҥин баран харыйабытын туруоруохпут».

Дракон сылын көрсөргө остуолга эбэһээт сыл бэлиэтэ баар буолуохтааҕын куйаар үөрэхтээхтэрэ бэлиэтииллэр. Ас көрүҥүттэн эти, сымыыты, ирииһи эгэлгэтик туттары сүбэлииллэр. Оттон куобаҕы уонна аһыы утаҕы сыл хаһаайынын өһүргэппэт туһугар, остуолга ууруу бобуллар.

Кытай табаарыттан Арассыыйаҕа оҥоһуллар табаар көрүҥүттэн көрөн сыаналара араастаһар. Холобур, 180 см. уһуннаах харыйа - 7 тыһ., оттон 215 см. - 26 тыһ., оттон 2 м. үрүҥ харыйа 11 тыһ. солк. Кэлэр сыл бэлиэтэ 1200-тэн саҕаланар, оттон мишуралар 100-тэн ыла уонна киирии ааҥҥа ыйанар веноктар 2000 солкуобай буолан тураллар.

Олег Симфонин, маҕаһыын үлэһитэ: «Следующий год – это год дракона. Как мы знаем, 4 цвета сейчас в тренде, это: серебренный, золотой, зелёный и красный. А по ёлкам у нас как видите лес, у нас 300 видов ёлок в магазине, то есть прямо очень много. Ёлки есть на любой вкус и на любой бюджет».

Ахсынньы 10-с күнүн кэннэ үгүскэ кубулуйбут «Якутлесресурс» тэрилтэ тыыннаах харыйалары атыылаан саҕалыаҕа.  Куорат уонна Нам эргин тыатыттан кэрдиллибит харыйа сыаната 1,5 тыһ. саҕаланар. Оттон тыаҕа тахсан көҥүлэ суох мас кэрдиитэ биирдиилээн дьоҥҥо ыстыраап сыаната 3-4 тыыһынча. Онон, бэйэ дьаһаныытыттан сэрэхтээх буолуҥ.