Хатаска хас да тутуу тэҥинэн бара турар
Эрбии тыаһа быһа куугунан, сварка уота өрө сандааран олорор. Хатастааҕы спорт комплексын тутуутун күннээҕи хартыыната. Манна билиҥҥи туругунан 52 киһи үлэлии сылдьар. Сүрүннээн инженернай ситимнэри тардааһын, уот ситимин, итиэннэ муостатын оҥоруу үлэлэрэ хааллылар. Саҥа спорт киинигэр хас да көрүҥүнэн тэҥинэн дьарыктанар кыахтаныахтара.
Эдуард Ефимов, Дьокуускай куорат физическэй култуураҕа уонна спорка салалтатын салайааччы: «Футбол, волейбол, баскетбол оонньуур сирдээх, уулуссаҕа эрчиллэр сирдээх. Бу спорткомплекс сайыҥҥы да кыһыҥҥы да өттүтүгэр үлэҕэ куоракка биир саамай үчүгэй эбийиэк буолуохтаах. Дьон мустан дьарыктанар уонна эт-хаан өттүнэн сайдар усулуобуйатын оҥорорго үлэни-хамнаһы ыытыахтаахпыт».
2016 сыллаахха Хатас нэһилиэгин соҕотох спорт саалата уокка былдьаммыта. Онтон ыла нэһилиэнньэ да, спортивнай да оскуола оҕолоро дьарыктаналларыгар кэккэ ыарахаттар үөскээбитэрэ. Ол эрэн эргэ оскуола саалатыгар 280 оҕону хабан дьарыктыыллар. Онтон саҥа комплекс үлэҕэ киирдэҕинэ 600-чэкэ оҕону хабар буолуохтара. Хатас оҕо спорт оскуолата бу комплекса көһөн киириэҕэ.
Анатолий Баишев, Хатастааҕы оҕо спортивнай оскуолатын тренерэ: «Билигин мас тардыһыы, хайыһар игин ДЮСШ-бытыгар баар. Оттон эбии тустуу, волейбол, футбол киириэхтээх уонна атын көрүҥнэргэ эбии тренердэр кэлиэхтээхтэр».
Өссө биир улахан эбийиэгинэн Хатастааҕы оскуолаҕа эбии дьиэ тутуута буолар. Сыллата кэҥии турар нэһилиэккэ 3 мэндиэмэннээх таас дьиэҕэ 19 кабинеты оҥордулар, манна 120 оҕону батарыахтара. Саҥа библиотека, аактабай саал, остолобуой уонна медицинскэй үлэһит хоһо үлэлиэхтэрэ. Үөрэнэргэ сөптөөх усулуобуйа олохтонно.
Виталий Окопов, СӨ тутууга миниистирин солбуйааччы: «Там есть абсолютно всё, что необходимо для школы. Мы добавили сюда часть специализированных кабинетов, в которых будет стоять компьютерное оборудование и расширенная химия и физика».
Билиҥҥи туругунан 400 миэстэлээх оскуолаҕа 900-тэн тахса оҕо үөрэнэр. Тутуу үлэтэ түмүктэнэн, аны саҥа үөрэх тэрилэ кэлэрин күүтэллэр.
Онон Хатаска икки улахан, баараҕай тутуу үлэҕэ киирдэҕинэ нэһилиэнньэ олоҕо-дьаһаҕа тупсан, үөрэнэргэ, дьарыктанарга табыгастаах усулуобуйа олохтонуоҕа.