Бааһынай ырыынагар тоҥ ас эгэлгэтэ

Дарья Зайцева бааһынай ырыынагар арыллыаҕыттан үлэлиир. Томороон тымныыны кытта доҕордоһон, уһун кыһыны быһа дьоҥҥо-сэргэҕэ ас бастаҥын атыылыыр. Өрөспүүбүлүкэ араас муннуктарыттан биирдии аатырар көрүҥнэри түмэр. Холобур, Бүлүүттэн сордоҥ, Халыматтан кыһыл балык - Горбуша, Чокурдаахтан чыыр уонна Аан дойдуну биир гына биллибит Кэбээйи Нидьилитин соболоро бааллар. Ордук куорат олохтоохторо балык ханнык арааһын ордороллорун атыыһыт үллэстэр.

Дарья Зайцева, атыыһыт: «Собону сөбүлүүллэр. Кэбээйи, Нидьили, Арыктаах соболоро минньигэс баҕайы, ону ылаллар үчүгэйдик. Уонна биллэн турар чыыры ыллаллар Чокурдаах киэнин».

Саҥа дьыл үгэнигэр дьон сырыыта элбиэҕэ, ол иһин балык сибиэһэйигэр, баарыгар тиксэр туһугар эрдэттэн ылан хаһаанар ордук. Саха ыалыгар биир даҕаны бырааһынньык тоҥ балыга суох ааспат үгэстээх.

Балык сыаната урукку дьыллардааҕар үрдээн турар. Кыһыл балык киилэтэ 1100 солк., собо дойдутуттан көрөн киилэтэ 300-400 солк. солкуобайга диэри халбаҥныыр, оттон чыыр балык киилэтэ 750 солк. буолан турар. Сыана ыарааһынын сүрүн төрүөтүн уопуттаах атыыһыттар бу курдук кэпсииллэр.

Марина Левина, атыыһыт: «Балык кэлэрэ ыарахан. Көтөр аалынан кэлэр барыта, ол иһин сыанабыт наһаа үрдээтэ. Ол да буоллар балыгы саҥа дьылга ылыахха наада».

Дарья Зайцева, атыыһыт: «Оттон нэдиэлэҕэ урут Чокурдаахтан үстэ көтөр этэ, билигин буоллаҕына тоҕо эрэ аччапыттар. Иккитэ эрэ көтөр, олорсооччулар да кыайан аҕалбаттар бэйэлэрин кыра балыктарын игин, таһаҕас тиэйэринэн кэлэр ини».

Эт сыанатыгар киирдээххэ, Чурапчы эдэр сүөһүтүн киилэтэ 750-1000 солк., оттон Уус-Алдан ынаҕын этэ 650-850 солк. диэри сыаналанар, оттон убаһа этэ 800-2000 солк. буолан турар. Таба этэ 600-800 солк. диэри, миин нобуора 400 солк. солкуобай. Ынах хаана 700 солк.

Ырыынакка саха таптаан сиир минньигэс аһа арааһа баар. Тансык диэн тоҥ убаһа быарыттан оҥоһуллубут дэликэтиэс устууката 500 солк., убаһаттан халбаһы 250 солк., тоҥ убаһа быара киилэтэ 4500 солк.

Сыана барытыгар үрдээн иһэринэн сибээстээн, ырыынакка бэйэ оҥорон таһаарыы аһа-үөлэ тэҥҥэ ыарыыр. Ол да буоллар олохтоохтор кэлии аһы буолбакка, бэйэ аһын ордук сэҥээрэн ылаллар. Бэйэбит сирбитигэр от, бурдук бастыҥын аһаан олорор сүөһүбүт этэ быдан минньигэс, саха киһитигэр барсар диэн бэлиэтээн этэллэр