Нам улууһугар кырдьаҕастар уонна инбэлииттэр дьиэлэрэ үлэҕэ киирдэ
Саҥа дьэндэйбит уораҕай үөрүүлээх аһыллыыта сиэр быһыытынан алгыстан саҕаланна. Намҥа Өрөспүүбүлүкэтээҕи кырдьаҕастар уонна инбэлииттэр дьиэлэрэ үлэҕэ киирдэ. 65 миэстэлээх икки этээстээх 4785 м2 иэннээх тутуу "Демография" нацбырайыак "Аҕа көлүөнэ" диэн федеральнай бырагырааматын иитинэн тутуллан киирдэ.
Айсен Николаев, СӨ Ил Дархана: «2 сыл 2 ый 11 күн аннараа өттүгэр биһи манна бастакы сыбаайаны түһэрбиппит. Тутааччылар сөпкө тутаннар, кэмигэр үбүлээһин кэлэн бу кырдьыктыы Нам сэлиэнньэтигэр билигин Өрөспүүбүлүкэбитигэр саамай үчүгэй кырдьаҕастарга уонна доруобуйаҕа хааччахтаах дьоҥҥо дьиэ тутулунна диэн эттэхпинэ сыыспатым буолуо. Ити үөрүүлээх дьоро күн үүммүтүнэн бука барыгытын итии истиҥник эҕэрдэлиирбин көҥүллээн».
Эбийиэк сыаната 600 мөлүйүөн кэриҥэ солбкуобай. 99 бырыһыана - федеральнай үбүлээһин. Үөрүүлээх аһыллыыга Нам баһылыга Юрий Слепцов сыралаһан үлэлээбит, болдьоҕун баттаһа бүтэрбит тутааччыларга, ону тэҥэ күүс-көмө буолбут биир дойдулаахтарыгар махталын биллэрдэ.
Юрий Слепцов, Нам улууһун баһылыга: «Лиэнскэй нэһилиэк тэрилтэлэрэ, улуус тэрилтэлэрэ бары тахсан субуотунньукктарга кыттан, үлэ бөҕөтүн ыытаннар: хомуйуу, суйуу, сотуу. Бу Лиэнскэй нэһилиэк дьаһалтата бу суол-иис ыраастааһынын ыытан. Бу эбийиэк үлэҕэ киирэрин кырдьыкты дьон-сэргэ барыта туран, кыттан үлэҕэ киирдэ».
Олохтоохторго бары өттүнэн табыгастаах, күннээҕи олохторун чэпчэтэр, тупсарар усулуобуйа олохтоммутунан ис сүрэхтэриттэн үөрэллэр. Таатта улууһуттан кэлэн олохсуйбут Мария Михайловна дьиэлэрэ тупсубутуттан астынан туран, үлэһиттэр кыһамньыларын, үчүгэй истиҥ сыһыаннарын ордук чорботон бэлиэтээтэ.
Мария Бочонина, кырдьаҕастар дьиэлэрин олохтооҕо: «Мин астынабын. Дьиэбит-уоппут, олорор сирбит, хосторбут, кэпсэтэр дьоннорбут, салайааччыларбыт бары наһаа үчүгэй, амарах санаалаах дьоннор. Наар үөрэ-көтө, куруук дьоллоох харахтары көрө сылдьаҕын уонна наһаа үчүгэй усулуобуйа баар ол иһин күммүтүн-дьылбытын билбэккэ ааһабыт».
Саҥа дьиэҕэ 4 хайысханан салаалардаах: аһымал, сынньалаҥ, көхтөөх уһун үйэлэнии, күнүскү сытар хос, ону тэҥэ социальнай уонна медицинскэй кабинеттар үлэлииллэр. Бары өттүнэн олоххо көхтөөх, сайдар кыахтаналларыгар анаан көмпүүтэр хоһо баар. Сынньалаҥ кэмнэрин туһалаахтык атааралларыгар, дьарыктаналларыгар бары усулуобуйа олохтоммут. Дьиэ салайааччыта Анастасия Степановна ытык ыалдьыттарга анаан хосторунан экскусия ыытта.
Ил Дархан Айсен Николаев саҥа уораҕай салайааччытыгар тыраанспар атыылаһалларыгар сертификат туттарда. Күн бүгүн бу дьиэҕэ 30 киһи олохсуйан олорор. Дьон көрүүтүгэр наадыйар дьоҥҥо бу курдук судаарыстыба болҕомто уурара олус суолталаах.