Өрүс суолун оҥорууга ириэс мэһэйдиир

Сарсыарда эрдэттэн саҕалаан суол үлэһиттэрэ үлэ үөһүгэр сылдьаллар. Константин Попов суолу оҥорууга үлэлэспитэ хаһыс да сыла. Бу да сырыыга кыһыҥҥы суолу оҥорууга үлэлэһэр. Үлэ сүрүннээн илиинэн оҥоһуллар буолан сылаалаах диэн кэпсиир.

Константин Попов, суол үлэһитэ: «Суол бэлиэлэрин туруора сылдьабыт. Сарсыарда 8 чаастан киэһэ 5 диэри үлэлиибит».

Бэдэрээччит былааннаммыт үлэ болдьоҕунан үлэтин саҕалаабыта, ол эрэн күн-дьыл туран биэрбэккэ кэккэ күчүмэҕэйдэри көрүстэ. Муус өссө да чараас сытар, уу киирэн, тааҥнаан өрүскэ тахсар кутталлаах. Ол эрэн билигин кыра-кыралаан араас үлэлэр ыытылла тураллар. Бу күннэргэ өрүскэ киирэн мууһу илиилэринэн ыраастыахтаах этилэр, эмиэ күн-дьыл туругуттан мууска киирбэккэ сылдьаллар.

Станислав Евсеев,"Мехдорстрой" ХЭТ сүрүн инженерэ: «Киирии суолларбытын оҥорон бүтэрдибит. Суол бэлиэлэрин туруортуу сылдьабыт. Онтон салгыы кыдьымах ыраастааһыныгар киириэхпит. Тааҥ кэлэн үлэбитин атахтаата, онон халлаан тымныйда эрэ үлэбит күүһүрүө».

Мэҥэ Хаҥалас өттүттэн үлэлэр бары түмүктэнэн тураллар. Онно Үөс-Кумах арыытыгар диэри суолларын оҥорон, арыыга баар кумаҕы уунан куппуттар. Онтон киин куорат өттүттэн айылҕа мэһэйдэриттэн үлэ лаппа бытаарда. Күүстээх тоҥоруулар суох буоланнар муус ситэ тоҥмокко, халынаабакка улахан уйуктаах тиэхиникэлэр киирэн үлэлииллэригэр табыгастаах усулуобуйа олохтоно илик.

Күнү-дьылы кэтээн көрөөччүлэр этэллэринэн бу нэдиэлэ эмиэ сылаас буолуоҕа. 20 кыраадыстан тымныйыа суоҕа дииллэр. Онон күүстээх тоҥоруу бу күннэргэ күүтүллүбэт. Тааҥнаан бүттэ да кыдьымаҕы ыраастаан, мууһу халыҥатыы үлэлэрэ барыахтара. Тоҥоруу буоларын бүтүн өрөспүүбүлүкэ олохтоохторо бары эрэнэ күүтэллэр. Саха сиригэр хас сылын ахсын буоларын курдук быйыл эмиэ 50-ча кыһыҥҥы муус суоллара арыллыахтара. Оччоҕуна сырыы олохтонон, кыһыҥҥы суолларынан барыы-кэлии үксүөҕэ. Онон олохтоохтор кыһыҥҥы суоллар арыллалларын эрэнэ күүтэллэр.