Олохтоох көҕүлээһини өйүүр тосхол нэһилиэктэри сайыннарар

Хамаҕатта нэһилиэгэр дьоро күн тосхойдо. Нэһилиэк олохтоох көҕүлээһини өйүүр бырагыраамаҕа кыттан саҥа киирии аартыгын оҥостон, үөрүүлээх быһыыга-майгыга арыйда.

Баараҕай тутуулар, тупсаҕай көстүүлэр, саҥа тимир көлөлөр. Сахабыт сирин нэһилиэктэригэр олохтоох көҕүлээһини өйүүр тосхолунан сыллата саҥаттан саҥа бырайыактар олоххо киирэллэр. Тустаах тосхол 2017 сыллаахтан үлэтин саҕалаабыта, онтон ыла хас биирдии бөһүөлэк, куорат көхтөөх кыттыыны ылан нэһилиэнньэ баҕатын олоххо киллэрэр. Хамаҕатта нэһилиэнньэтэ өрөспүүбүлүкэҕэ, улууска ыытыллар араас күрэхтэргэ көхтөөхтүк кыттаннар олорор усулуобуйаларын, тулалыыр эйгэлэрин тупсараллар.

Саргылана Заирова, Хамаҕатта нэһилиэгин "Арыы тиит" түөлбэтин салайааччыта: «Ол куонкуруска нэһилиэкпит аатыттан кыттан бастакы миэстэни ылбыппыт. Итиннэ хоомут үппүтүгэр, 306 тыһыынча солкуобайга нэһилиэкпит дьоно-сэргэтэ сынньаналларыгар анаан беседка туттардыбыт».

2017-2022 сыллар усталарыгар Саха сиригэр уопсайа 1920 эбийиэк тутуллан үлэҕэ киирдэ. Сүрүннээн нэһилиэнньэ иһэр уу кыһалҕатын туруорсар, онтон биир дойдулаахтарын, биллэр-көстөр дьоннорун үйэтитиигэ анаан сквердары туттараллар уонна тыын суолталаах суол боппуруоһун, уот, сылаас, күөх төлөн киирэригэр куоластаан араас тутуулары ыыталлар. Бу бырагырааманы Үп министиэристибэтэ сүрүннээн, сайаапкалары тыыран, кыайыылаахтары быһаарар. Итиэннэ нэһилиэнньэ үбүнэн кыттыһар, спонсордары булар.

Наталья Федотова, СӨ үп министиэристибэтин үбүлээһини көҕүлүүр салаатын исписэлииһэ: «Сыл аайы судаарыстыбаннай бүддьүөттэн бу бырагыраамаҕа анаан үбүлээһин көрүллэр. Уопсай суумма 500 мөлүйүөн солкуобай. 2023 сыллааҕы куонкуруска 400 тахса муниципальнай тэриллии кыттыыны ылбыта».

2017-2022 сс. олохтоох көҕүлээһин тосхолунан 1920 эбийиэк тутуллан киирдэ:

Уу эбийиэктэрэ- 358

Сквердэр - 346

Спортивнай былаһааккалар - 190

Суол оҥоһуута - 190

Уот, сылаас, күөх төлөн тутуулара - 118

Култуура кииннэрин тупсарыы - 102

Оҕо былаһааккалара - 68

Үөрэх тэрилтэтин тупсарыы - 39

Сибээс тардыыта - 28

Нэһилиэнньэ 2023 сылга туруоруллубут сыалын толору олоххо киллэрдэ. Аны эһиилги сылга бырайыагы оҥоруу, куоластааһын түбүгэр сылдьаллар. Хамаҕатталар аны 2024 сылга спорду көҕүлүүр, сайыннарар соруктаах саҥа тупсаҕай оҥоһуулаах хоккейдыыр сири туруорсаллар. Сайаапкаларын сэтинньи ый 21 күнүгэр диэри туттарыахтаахтар.

Василий Сивцев, Хамаҕатта нэһилиэгин олохтооҕо: «Хамаҕаттаҕа хоккей 70-сс саҕалаан сайдыбыта. Ол иһин хоккейдыыр корт тутуутун туруорсабыт».

Бу курдук Сахабыт сиригэр араас тутуулар киирэннэр, олохтоох көҕүлээһини өйүүр бырагырааманан нэһилиэнньэ бүттүүн куоластааһынынан улуустар, нэһилиэктэр тупсаллар. Олохтоохтор кыһалҕаларын быһааран, баҕа санааларын олоххо киллэрэн олорор усулуобуйаларын тупсараллар.