Дьокуускай хаарын ыраастааһыныгар саҥа ньымалары киллэрдилэр
Дьокуускай куорат суолун-ииһин ыраастыыр тутаах тэрилтэтин үлэһитэ Дмитрий Иванов элбэх хаар түһүүтэ үлэбитин элбэтэр диэн кэпсиир. Кини суол үлэтигэр киирбитэ сыл аҥарыттан орто. Араас күҥҥэ-дьылга томороон да тымныыга, өҥүрүк да куйааска түбүгүрэр үлэһиттэр 2 симиэнэнэн арахсан сууккаҕа 8-тан 12 чаас быыстала суох хаары ыраастыыллар. Хас биирдии уулуссаҕа сатыы сылдьар дьон хаамар сирин, автобус тохтобулларын аттыгар хаары кытта охсуһаллар. Бу Горькай уулуссатын кытыытын, дьиэлэргэ киирии суолу хаартан босхолоон, техникэ тиэйэригэр бэлэмнииллэр.
Дмитрий Иванов, суол тэрилтэтин үлэһитэ: «Биһиэхэ сорудах биэрэллэр, онон үлэлиибит. Үлэбит элбэх, сарсыарда 8-тан үлэлиибит».
Күнтэн-күн үлэ бүтэр уһуга көстүбэт. Мантан кыһын өссө эбиллэ турдаҕа. Дьокуускайы хаартан ыраастыырга анаан-минээн 30-40ча тиэхникэ тахсар. Икки симиэнэнэн солбуйсан үлэ күестүү оргуйар. Ол эрээри сылын ахсын маннык дьаһаныы табыгаһа суоҕунан, ону тэҥэ куорат улаханынан хаары ыраастыырга алтынньы ыйтан эбии илии күүһүн туһанар быһаарыы ылыннылар.
Татьяна Николаева: «Быйыл күһүн Дьокуускай хаарын ыраастааһыҥҥа тиэйиигэ саҥа ньымалары киллэрдилэр. Ол курдук эрдэ бу куорат хаарын бүтүннүүтүн биир тэрилтэ – Якутдорстрой эрэ ыраастыыр, тиэйэр-таһар буоллаҕына, билигин эппиэтинэһи-эбээһинэһи хас биирдии балаһанан араардылар. Ол курдук, хас биирдии дьаһал бэйэтэ бэдэрээтчит булан тротуардары ыраастатар кыахтанна. Бу маннык саҥа ньыма хаартан ыраастыырга, тиэйиигэ-таһыыга ордук табыгастаах диэн таһаардылар».
Онон хас биирдии уокурук эбии тэрилтэни кытыннаран, хаары уопсай күүһүнэн хомуйар буоллулар. Холобура Сайсары уокуругар тустаах тиэхникэни наймылаһан алта киһи хаары ыраастыы сылдьар, маныаха управа үлэһиттэрэ эмиэ көмөлөһөллөр.
Владимир Слепцов, Сайсары уокуругун управатын салайааччыта: «Бэдэрээтчиппит үлэлии сылдьар, анал тиэхиникэлээх, икки погрузчиктаах, икки самосваллаах уонна алта үлэһиттээх. Бу баскыһыанньаҕа улахан хаар түспүтэ, ол иһин биһи бары көмөлөөн хаары күрдьүбүппүт. Билигин даҕаны бэдэрээтчиппит үлэлии сылдьар».
Быйыл күһүн уһаан, күнүһүн ириэрэн, түүнүн тоҥорон суолларга, уулуссаларга бэрт халтыраан. Онон күн аайы автобус тохтобулларыгар, эргиир итиэннэ элбэх сырыылаах суолларга өрүс кумаҕын, бытархай тааһы куталлар. Онтон күн устата хомуйбут хаардарын тустаах полигона илдьэн куталлар.
Владислав Слепцов, Дьокуускай дьаһалтатын территориялары сайыннарыыга департаменын салайааччыта: «Бүгүҥҥү күҥҥэ эттэххэ 40-ча бэдэрээтчит үлэһитэ үлэлии сылдьар, онтон ураты 56 муниципальнай олбуору ыраастыыр үлэһит көмөлөһөр. Кинилэр хаар ыраастыыллар. 10-ча тиэхиникэ үлэлии сылдьар: кыра погрузчиктар уонна самосваллар»
Сэтинньи ый үүнэн кыһыммыт сыыйа тымныытын күүһүгэр киирэн эрэр. Түүнүн 20-тэн тахса кыраадыска диэри, күнүһүн 10-тан тахса кыраадыска диэри тымныйар. Быйыл сылаас уһун күһүн турда, онон өрүһүнэн айан-сырыы тохтуу илик. Күнү-дьылы кэтээн көрөөччүлэр бэлиэтииллэринэн, быйыл Өлүөнэ эбэбитигэр кыдьымах икки нэдиэлэ хойутаан киирдэ.