Дьокуускайга хоту улуустартан сибиэһэй балык кэллэ
Уйгулаана Николаева: «Билиҥҥи туругунан Михаил Мальчиков теплоходунан тиэйиллэн кэлбит 18 туонна балык бэрэбиэркэни ааһан сытар: муксун, ряпушка уонна балык атын көрүҥнэрэ кэллилэр».
Сибиэһэйдии тоҥоруллубут балыктары куулга хаалаан аҕаллылар. Аҥаардас өрөспүүбүлүкэ эрэ олохтоохторугар буолбакка, бу балыктар Дойду атын куораттарыгар тиийэ бараллар. Дьокуускайдааҕы өрүс пуордугар кэлбит теплоходтартан кыраанынан кууллаах балыгы сүөкүүллэр. Көмүс хатырыктааҕы мунньа мунньа, массыыналарга тиэйэллэр.
Оттон бу кэлбит балыктар дьоҥҥо-сэргэҕэ атыыга барыахтарын иннинэ, Россельхознадзор кытаанах бэрибиэркэтин ааһаллар. Сейф пакетка уган баартыйаттан биирдии боруобаны ылаллар. Хас биирдии боруоба анал туспа нүөмэринэн бигэргэнэр, ас-үөл хаачыстыбатын туруга биллэригэр биирдэ арыйан көрөллөр.
Владислав Томскай, Россельхознадзор Саха сиринээҕи салаатын ветеринарнай кэтээн көрөр сулууспатын инспиэктэрэ: «Боруобаларбытын үксүн федеральнай лабараторияларга ыытабыт: Иркутский филиал ФГБУ “ВНИИЗЖ” в городе Иркутске уонна ФГБУ “НЦРБП” Национальный центр безопасности рыбного промысла диэн. Балыктарбытын үксүн химико-токсикологическай чинчийии ааһаллар, радиология уонна вируснай ыарыыларга. Тутуллубут күнүн көрөбүт. Хаһыс күнүн көрөбүт».
Россельхознадзор инспиэктэрдэрэ бэлиэтииллэринэн балыгы тиэйиигэ кэһиилэр бааллар. Ол курдук теплоходка тиэйиллиэн иннинэ эбэһээт эппиэттэһэр ирдэнэр докумуоннара баар буолуохтаах.
Игнатий Колодезников, Россельхознадзор Саха сиринээҕи салаатын судаарыстыбыннай кыраныыссаҕа уонна транспортка салайааччытын солбуйааччы: «11-тэн 9 хозсубъекка кэһии буллубут уонна кинилэргэ сотору кэмҥэ сэрэтии бэриллиэҕэ. Тутаах 3 кэһиллиилээхтэр, ол аата ветеринарно-санитарнай экспертизалара суох, оформлениялара мөлтөх. Онон биһи ветеринария департаменыгар сурук суруйбуппут».
Сылга 3 улахан тиэйиини оҥороллор. Олортон бастакы аҕалыы атырдьах ыйын саҕаланыыта, иккис балаҕан ыйын саҕаланыыта уонна түмүктүүр үһүс бу алтынньы ый бүтүүтэ кэллэ. Балык атыытынан 13 сылын дьарыктанар Булун улууһуттан сылдьар Руслан Лукин үлэ үөһүгэр сылдьар. Бастыҥ хаачыстыбалаах балык дьоҥҥо-сэргэҕэ тиийэригэр кини тэрилтэтигэр билигин 90 киһи үлэлиир.
Руслан Лукин, муниципальнай биир кэлим тэрилтэ дириэктэрэ: «Бу күндүөбэй Дьокуускайга хаалар, барытын нэһилиэнньэҕэ атыылыыбыт. Онтон муксуун соҕуруу барар: Москва, Красноярск. Булуҥҥа Күһүр бөһүөлэгэр балыктанан кэллилэр. Бу тэрилтэҕэ 90-тан тахса киһи үлэлиир онтон 60 балыксыттар. Дьон саамай сөбүлүүр балыга уомул уонна күндүөбэй буолар, күндүөбэйи олох сөбүлээн сииллэр».
Дьокуускай куорат олохтоохторун бу өрөбүллэргэ Аччыгый баһаарга Саха сирин балыктара бэстэбээлгэ күүтэллэр. Атыыга бастыҥ хаачыстыбалаах сибиэһэй туустаах, тоҥ күндүөбэй, уомул, чыыр уонна да атын балык арааһа баар буолара күүтүллэр.