Саха тыйаатыра "Таптал" испиктээкили туруорар

Алампа "Таптал" драмата Саха тыйаатырын улахан сыанытыгар саҥалыы ураты туруоруулаахтык оонньонно. Сүрүн ураты - испиктээкил ырыа доҕуһуоллаах барар. Маныаха анаан режиссер Руслан Тараховскай Алампа "Ырыа быстыыта хоһоон" диэн хомуурунньугар  киирбит 11 хоһооҥҥо матыып айан испиктээкилгэ киллэрбит. Итиэннэ бэйэтэ туруоруу хаамыытыыгар кыттыһан, гитараҕа доҕуһуоллуур. 

Руслан Тараховскай, Саха тыйаатырын сүрүн режиссера: «Кэҥээн биэрдэ улахан саалаҕа көһөн уонна уота-күөһэ турара уларыйдаҕа. Кынан баран ис хоһооно уонна артыыстар ырыалара Алампа хоһоонунан туох да уларыйбата. Мин көрөрбүнэн, өссө быһа киэргэнэн, тупсан биэрдэ дии саныыбын. Оттон этэҥҥэ бу саалаҕа премьералатахпытына, бу испиктээкил репертуарга өссө да бара туруо».

Сыанаҕа дьоруойдар дьылҕаларын арыйар дириҥ суолталаах символ элбэх. "Быата тардыбыт", "туох барыта быалаах-туһахтаах", "көхсүттэн тэһииннээх" диэн дьылҕаны кытары ситимнээх өйдөбүллэр турорууга бааллар. Испиктээккэ баар доруойдар эмиэ дьиктилэр. Холобура, оччотооҕу батталлаах олоххо күлүм гынар сырдык чыычаах оҕолор.  

Кэтириис оруолун Ирина Михайлова толорор. Батталлаах олох оонньуура буолбут кыыс ыарахан дьылҕатын кини итэҕэтиилээхтик көрдөрөр. Кэтириис уобараһын арыйарга  соҕотох баҕана, иччитэ суох чыычаах уйалара көмө буолаллар.

Ирина Михайлова, саха тыйаатырын артыыһа: «Икки ырыалаахпын бу  испиктээкилгэ. Наһаа үчүгэй Алампа хоһооннорунан Руслан Тараховскай суруйбут ырыалара. Өр баҕайы оҕобун көрө олорон баран эмискэччи тахсаммын дэлби долгуйа сылдьабын. Кэтириис уобараһа боростуойа суох. Дьылҕалаах дьахтар оруола уустук буоллаҕа, ону туох баар олоҕум уопутунан түмэммин оҥорон таһаардым».

Бу испиктээкил 2020 сыллаахха тыйаатыр кыра саалатыгар тура сылдьыбыта. Онтон хамсык кэмигэр тохтуу сылдьан баран дьэ улахан сыанаҕа сүрэхтэннэ. Көрөөччү биһирэбилин ылбыт туруоруу буолан сөргүтэргэ быһаарбыттар. Бүөтүр оруолун эрдэ Валентин Макаров толорбута, онтон бу сырыыга быйыл Щепкин аатынан театральнай училищены бүтэрэн кэлбит Григорий Иванов толордо. Эдэр артыыс таптал, көҥүл олох иһин туруулаһааччы оруолун арылхайдык биэрдэ.

Григорий Иванов, саха тыйаатырын артыыһа: «Ньурбаҕа гостуруоллаан кэлбиппит. Онно бараары сырыттахпына оруолбун биэрбиттэрэ. Гостуруоллуу сылдьан оруолум тиэкстин үөрэтэ сылдьыбытым».

Саха тыйаатыра бу нэдиэлэттэн саҥа сезонун арыйда. Көрөөччүгэ Таптал драманы сэргэ Илиир Хоруол, Тулаайах оҕо, Ойуур испиктээкиллэри бэлэхтиэ. Билиэт Пушкин картатынан атыыланар. Онон тыйаатыр алыптаах эйгэтигэр сылдьар өссө судургу буолла.