Хоту уонна Арктическай улуустарга уунан таһаҕаһы тиэйии түмүктэннэ

Иккис килиэпкэ тэҥнээх аспыт - хортуоппуй анал оборуудубанньаҕа киирэн, ырастаныы туһумэхтэрин ааһар. Оттон бу "Якутоптторг" тэрилтэ, улахан 5 туонна аһы үөлү биирдэ батарар оҕуруот аһын харайар ыскылаатыгар үлэ үгэннээҕэ бара турар.

Анастасия Добрянцева: «Якутопторг тэрилтэ Хоту уонна Арктика улуустарыгар хортуоппуйу ыытыытын саҕалаан эрэр. Ол курдук билигин анал аппараакка Өлүөхүмэ хортуоппуйун куһаҕанын-ырааһын талан ыраастыы сылдьаллар. Онтон бу наардаммыт хортуоппуй тиийэн куулланан сотору кэминэн Хоту улуустарга тиийиэҕэ»

Хоту уонна арктическай оройуоннарга өрүс суолунан таһаҕаһы тиэйии түмүктэнэр уһугар кэллэ. Билигин кыһыны туоруур оттүк барыта кэриэтэ тиийбит эбит буоллаҕына, билигин аны аһы-үөлү илдьии инники куеҥҥэ. "Якутоптторг" тэрилтэ аны көтөр аалларынан бородууктаны илдьэр кэмигэр киирдэ.

Галина Румянцева, «Якутоптторг» тэрилтэ оҕуруот аһын ыскылаатын сэбиэдиссэйэ: «Биһи билигин хортуоппуй, хаппыыста тутан бараммыт Хоту улуустарга көтөр аалынан ыытабыт. Билигин Өлүөхүмэ хортуоппуйа наардана турар. Көтөр ааллар нэдиэлэҕэ 4 сырыы оҥороллор, ахсынньы ыйга дылы көтөллөр. Онтон кыһыҥҥы суол арыллыннаҕына массыынаннан ыытабыт».

20 сыл устата Хоту олорор дьоммутун удамыр сыаналаах аһынан-үөлүнэн хааччыйа олорор "Якутоптторг" тэрилтэ навигация кэмигэр 2 тыһ. туоннаттан тахса былааннаммыт аһын-үөлун миэстэтигэр тириэртэ. Билигин аны үлэтин кыһыҥҥы кэмин саҕалаата.

Анна Григорьева, «Якутоптторг» тэрилтэ атыыга уонна эргиэҥҥэ салаатын салайааччыта: «Кыһыҥҥы бородуукта тиэйиигэ үлэ бара турар. Былырыыҥҥы былааммыт 7 тыһ. туонна этэ, ону быйыл аһарар былааннаахпыт. Улуустартан сайаапка ыла олоробут уонна бу 18 чыыһылаттан халлаан аала сырыыта саҕалаата. Уута суох улуустартан саҕалаабыппыт – Үөһээ Дьааҥы, Өлөөн уонна Муома улуустарыттан».

Манна даҕатан эттэххэ, Саха Өрөспүбүлүкэтин гражданскай оборуонатын уонна нэһилиэнньэ олоҕор-дьаһаҕар куттал суох буолуутун хааччыйар министиэристибэтэ иһитиннэрэринэн күн бүгүн уунан таһаҕаһы тиэйии үлэлэрэ түмүктэнэн, Хоту уонна Арктическай улуустарга кыһыны туоруур оттуктара толору тиийдэ.

Никита Павлов, СӨ нэһилиэнньэ олоҕор куттал суох буолуутун уонна олох-дьаһах эйгэтин хааччыйар судаарыстыбаннай кэмитиэт бэрэссэдээтэлин солбуйааччы: «Бүгүҥҥү күҥҥэ 365 тыһ. туонна тиэрдиллэн турар. Ол курдук былырыыҥҥыны тэҥнээтэххэ 161 тыһ. туонна тиэрдиллибит буоллаҕына, быйыл 165 тыһ. Сылтан сыл аайы тиэрдиллэр таһаҕас үрдээн иһэр. Быйыл Дьааҥы өрүскэ былааммытынан 151 тыһ. туонна этэ. Индигиир өрүскэ былааммыт 52 тыһ. туонна. Ол курдук барыта 100% туолан турар. Халыма өрүскэ 78 тыһ. туонна буоллаҕына 79 тыһ. тиэрдиллибит, ол курдук 101% туолла. Анабар өрүскэ былааммыт 48 тыһ. туонна буоллаҕына быйыл 47 тыһ. туонна тиэрдиллэн турар».

Онон билигин уунан таһаҕас тиэйиитэ түмүктэннэ. Туроруллубут былаан туолла.