Дьокуускай - Аллараа Бэстээх туһаайыытынан дьоҕус уу ааллара сырыыларын тохтотуохтара

Уйгулаана Николаева: «Билигин өрүс кытыыта номнуо мууһуран мотуоркалар мотуордарын күнүстэри-түүннэри холбоон хоннороллор. Онон бу нэдиэлэ устата өрүһү түргэнник туоратар сырыы төлөбүрэ 700 диэри улаатта».

Ленаводсервис дьону өрүс нөҥүө туораппыта 20-чэ сыла буолла. Бу сыллар тухары дьыл кэмиттэн көрөн сөптөөх техниканы таһаараллар. Кыһыҥҥы күн саҕаланыыта сайыҥҥы мотуоркалар сылдьалларыгар бу нэдиэлэ устата мэһэйи үөскэппэт, оттон кэлэр нэдиэлэттэн өрүс туруор диэри наадалаах дьон салгын сыттыктаах аалынан туоруохтара. Дьон олоҕор куттал суоһаабатын туһугар биир ый кэриҥэ сылдьар техниканы сайыны быһа өрөмүөннээн бэлэмнииллэр.

Борис Строев, "Ленаводсервис" дириэктэрин солбуйааччы: «Сайыны быһа 500 солк. таспыппыт, хас да сыл буолла, онтон күһүн 600 солк. оҥорбуппут. Бүгүн навигация бүтэн эрдэҕинэ эмиэ бензин ыараата уонна эргийэрбит ыраах буолла, икки төгүл улаатта».

Дьону туоратар ааллар сарсыарда 7 чаастан киэһээ 6-ҕа диэри сылдьаллар. Бириэмэнэн буолбакка, дьон туоллаҕына айаанныыр. Оттон сырыы хантан барара билиҥҥи туругунан өссө быһаарылла илик. Саҥа тутулла турар 204 түөлбэ Намыв станцияттан, эбэтэр 203 түөлбэттэн сылдьыаҕа. Оттон паромнар сырыылара алтынньы ый 18 күнүттэн 25 күнүгэр диэри дьыл кэмэ турар бириэмэтигэр сыаналара үрдээтэ. Өскөтүн сылаас күн уһуур түгэнигэр, бу ый бүтүөр диэри паромнар сылдьыахтара диэн транспорт министиэристибэтигэр иһитиннэрэллэр.

Анатолий Потапов, СӨ транспорт уонна суол хаһаайыстыбатын миниистирин бастакы солбуйааччыта: «Ааллар тохтуур сирдэригэр бырайыактаах смета докумуоннара оҥоһуллаллар - «Станция Намыв» диэн. Итиннэ 237 мөл. сыаналаах объект бырайыактаах смета докумуоннара госэкспертизаттан таҕыста. Билигин күрэх атыы буолан бэдэрээтчит булан бу Дьокуускай куорат өттүттэн билигин хантараак баттаһан эһиил бу объект олоххо киириэхтээх».

Мууһу солуур аал сылдьар кэмигэр сыттык олбохтор арыыга тохтобуллаах биир нэдиэлэ устата сылдьыахтара. Ити кэмҥэ сыана икки төгүл үрдүүрэ күүтүллэр. Оттон күнү-дьылы кэтээн көрөөччүлэр Өрөспүүбүлүкэ Хотугулуу-илин оройуоннарыгар бастакы улахан тымныылар турбуттарын бэлиэтээтилэр.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаа салайааччыта: «Алтынньы ый сылаас бастакы декадата ааһан, кыһыммыт бастакы кэрдииһигэр үүктэннибит. Киэҥ өрөспүүбүлүкэбит баһыйар өттүтүгэр кыстык хаар түһэн кыһын былааһын ылан турар. Онтон соҕуруулуу-арҕаа киин улустаарга хаара суох олоробут. Өрөспүүбүлүкэ соҕуруу уонна киин улуустарыгар хаарбытын күүтэбит. Хотугулуу-илин улуустарга бу күннэргэ бастакы -30 кыраадыстаах тымныылар бэлиэтэннилэр. Салгын температурата түүнүүн -1, -6. Хотугулуу-илин –25, -30 кыраадыс тымныы».

Быйылгы дьылга өрүс уута түһэн, мотуоркалар урукку суолларынан буолбакка, икки төгүл ыраах сиринэн эргийэ сылдьаллар.