Нолуок үлэһиттэрин маҥнайгы форума ыытылынна
Нолуок эйгэтигэр урбаанньыт Александра Окорокова Уһук Илин региоҥҥа аан бастакытын ыытыллар нолуок форумугар уопут атастаһа, санаатын этэ, саҥаны билэ - көрө кэллэ. Маннык саҥа сүүрээн тэрээһин тэриллибититтэн, урбаанньыт киһи быһыытынан, олус туһалаах диэн санаатын үллэстэр.
Александра Окорокова, форум кыттыылааҕа: "Мин форумҥа нолуогу судургутуллубут ньыманан төлөөһүн хааччаҕын хайдах гынан кэҥэтэр туһунан уонна бу кыһалҕаттан сылтаан урбаанньыттар тэрилтэлэрин түөрт биэс гына бытарытан төһөлөөх ыарахаттары көрсөллөрүн туруорсууну. Итиэннэ бу түгэн сокуоҥҥа бигэтик суруллубатаҕын иһин өйдөммөт суолтан нолуок сокуонугар элбэх кэһии тахсан эппиэтинэскэ тардыллыыны хайдах туоратар туһунан олус сэҥээрэн иһиттим".
Саха өрөспүүбүлүкэтин урбаан, атыы-эргиэн уонна туризм министиэристибэтин көҕүлээһининэн киин куоракка аан бастакытын нолуок форума бу эйгэ идэлээхтэрин итиэннэ урбаанньыттары уопсайа 150 кыттааччыны түмтэ. Сүрүн сыал-сорук урбаанньыттарга көмө, улахан дохуоттаах тэрилтэлэргэ нолуогу төлөөһүҥҥэ судургутуу боппуруостарын ырытыы буолла.
Альбина Кычкина, СӨ урбаанньыттар бырааптарын көмүскүүргэ боломуочунайа: "Урбаанньыттары долгутар икки сүрүн боппуруоһу быһаарыстыбыт. Ол курдук нолуогу судургутуллубут ньыманан ааҕыы хааччаҕын быһаарыстыбыт. Манна юристар, билим үлэһиттэрэ, урбаанньыттар, нолуок уорганын исписэлиистэрэ уонна былаас буолан быһаарыстбыт. Итиэннэ сөптөөх быһаарыыны тобуллубут. Салгыы үлэлэһиэхпит".
Сытыы боппуруоска эппиэт булуллан, салгыы түмүк тахсан, ый иһинэн бүтэһиктээх докумуон тахсыаҕа. Оттон манна араас бэдэмистибэлэр, министиэристибэлэр биир сомоҕо буолан үлэлээһиннэрин түмүгүн көрүөхпүт.
Пётр Попов, СӨ экономикаҕа миниистирэ: "Экономика биир сайдар хайысхатынан урбаан буолар. Онон өрөспүүбүлүкэ Бырабыыталыстыбата, экономика министиэристибэтэ бу хайысханы эмиэ күүскэ өйүүр. Ол курдук анал судаарыстыбаннай бырагыраама үлэлиир. Бу чэрчитинэн урбаанньыттарга үлэлиир усулуобуйа тэриллэр, ол иһигэр чэпчэтиилээх нолуок киирэр. Бу үлэни сөпкө ыытаммыт урбаан өттүгэр уонна бүддьүөт туолуутугар ситимнээх буолар гына үлэни ыытабыт".
Тэрийээччилэр иһитиннэрэллэринэн бастакы форум үрдүк таһымнаахтык ааспыт. Манна даҕатан эттэххэ, бу тэрээһин үгэскэ кубулуйан, сыллата ыытыллыаҕа.